Të kuqtë në lot, sherr mes tifozëve në tribuna
Stadiumi plot, kryeqyteti sfidoi... Koronavirusin
Futja e sportdashësve në shkallët e sta diumit ka filluar 2 orë para startit të sfidës, teksa nuk kanë munguar përplasjet mes tifozëve bardheblu e të kuq dhe forcave të policisë. Tifozët kanë hedhur shishe dhe fishekzjarrë në drejtim të policisë si dhe nuk kanë munguar sharjet në kor. Edhe në krahun e Partizanit ka pasur probleme të mëdha për shkak të kartave të identitetit që kërkonte policia. Ka qenë luftë e vërtetë, por në fund është “dorëzuar” policia. Pas disa përplasjeve me tifozët jashtë stadiumit, policia ka hequr dorë nga masa e tyre, teksa tifozët futen në stadium pa karta identiteti. Tifozët që kishin ngelur jashtë pak minuta para fillimit të ndeshjes, u futën shpejt e shpejt në stadium, ku shijuan spektaklin e derbit të kryeqytetit mes Tiranës dhe Partizanit.
Megjithëse derbi i 156-të në histori mes Tiranës dhe Partizanit nuk u shoqërua me incidente mes tifozërive dhe futbollistëve në fushë, një konfrontim fizik u shënua në tribunën VIP të stadiumit “Air Albania”. Dy persona janë konfliktuar fizikisht me njëri-tjetrin në minutat e fundit të sfidës. Nuk dihet cilat kanë qenë shkaqet e këtij incidenti. U desh ndërhyrja e stjuartëve për të vendosur qetësinë. Tifozët e Partizanit janë shoqëruar me polici deri në dalje të stadiumit, ndërsa më pas në rrugë palët janë goditur me njëra-tjetrën. Policia ka shoqëruar në komisariat disa tifozë të dhunshëm.
Goli i tretë i ndeshjes për bardheblutë erdhi nga mbrojtësi i Partizanit Hektor Idrizaj. Anësori i djathtë i të kuqve shënoi gabimisht në portën e tij në përpjekje për ta nxjerrë topin jashtë porte. Por, ajo çfarë tërhoqi vëmendjen ishte reagimi i mesfushorit të Tiranës, Idriz Batha. I ndodhur pranë Idrizajt në momentin e shënimit të autogolit nga vlonjati, Batha inkurajoi Idrizajn, i cili qëndroi i shtrirë në fushë në shenjë dëshpërimi. Gjesti i Bathës është vlerësuar pozitivisht duke treguar “fair play” sportiv.
Përhapja e Koronavirusit nga Azia e largët në Itali brenda një kohe të shkurtër ka frikësuar shumë qytetarë dhe në Shqipëri. Edhe në derbin e djeshëm, i cili është luajtur në “Air Albania”, një qytetar ka vendosur maskë në fytyrë për të shmangur infektimin e mundshëm nga Koronavirus.
Drejtori i Kukësit, Nderim
Nexhipi dhe një nga djemtë e Safet Gjicit ishin në stadium për të ndjekur derbin e kryeqytetit.
Ish-trajneri i Tiranës, Ardian Mema, ishte i pranishëm në stadium për të ndjekur derbin numër 156.
Përqafime mes lojtarëve në dy kampet gjatë kontrollit të fushës në stadium.
Skuadra fituese e Kupës së Shqipërisë, Tirana U-17, parakalon në stadium, duke marrë ovacionet e tifozëve. Bardheblutë e vegjël fituan ndaj Partizanit në finale.
Marcelo Troisi ishte i pranishëm në stadium për të ndjekur derbin. Javën tjetër Tirana udhëton në Vlorë për të luajtur ndeshjen e javës së 7-të të fazës së tretë.
Lorenc Trashi në fushë, por për të takuar shokët e skuadrës, duke i dhënë zemër. Në fund të ndeshjes, lojtari ishte i shkatërruar moralisht dhe fizikisht në fund të takimit.
Pas golit të parë të ndeshjes, Melo bën me shenjë: “Jam unë këtu”, në momentin që shënon gol. Futbollisti kishte lyer edhe flokët me ngjyrë të kuqe.
Në fillim të pjesës së dytë, Adolfo Sormani këshillon lojtarët si të luajnë, në veçanti Telushin.
Në momentin kur rezultati i takimit ishte 4-1, tifozët e Tiranës filluan të brohorisnin: Edhe një, edhe një. Dhe këtë dëshirë ua plotësoi Ernest Muçi.
Lot dhe trishtim te Partizani. Nëse te bardheblutë kishte festë, te të kuqtë situate ishte tragjike. Futbollistët kanë shpërthyer në lot, pas humbjes 1-5 ndaj Tiranës. Nga sa është bërë e ditur, të gjithë kanë qenë shumë të dërrmuar për atë që ndodhi në fushën e lojës.
Në stadium u dëgjuan thirrjet nga ana e tifozëve të Tiranës: “Mbyti komunistët”.
Në minutën e nëntë, Batha mbërthen Kordeiron një moment, por nuk ka karton, vetëm këshillim nga ana e Xhajës. Lojtari bardheblu tha në fund të ndeshjes se futbollisti brazilian e kishte goditur, prandaj reagoi kështu.
Ndeshja nis me pesë minuta vonesë, pasi tifozët e Partizanit hedhin fishekzjarrë në fushë, si dhe tymuese. Përgjigjen edhe tifozët e Tiranës me fishekzjarrë të ndryshëm. Si zakonisht, tifozët bëjnë të pamundurën për të
futur sende të paligjshme në stadium dhe kjo u pa edhe në ndeshjen e djeshme.
Adolfo Sormani e ka gjithë kohës me të katërtin. Trajneri proteston për çdo gjë, duke filluar nga faullet e me radhë.
Në fund të pjesës së parë Juxhin Xhaja nuk do të japë karton për Dokën, presioni i të kuqve bën që të ketë karton të verdhë.
Pas shënimit të golit, ku braziliani ia dedikoi Trashit, Melo tenton të heqë fanellën duke festuar, por dikush nga stoli e këshillon të mos e bëjë pasi është vetëm minuta e dytë dhe merr karton të verdhë. Braziliani tregohet i zgjuar, edhe pse në delir pas golit, duke ndërruar mendje dhe evituar kartonin e verdhë.
Në minutën e pestë të takimit, Alban Hoxha këshillon Bitrin dhe Belicën se si duhet të sillen në fushën e lojës.
Në fund të ndeshjes, Tefik Osmani merr një flamur gjigant nga tifozët dhe e çon në mes të fushës dhe e ngul te pika e bardhë nga nis loja. Një gjest që ekzalton tifozët bardheblu. Skuadra feston gjatë me “Tirona Fanatics”.
Dy tifozë bardheblu hynë në fushën e lojës për të marrë flamurin gjigant, por provokojnë edhe tifozët e Partizanit. Ndërhyjnë stjuartët për t’i nxjerrë nga fusha tifozët bardheblu që provokuan tifozët
e kuq.
Refik Halili ka zbritur në dhomat e zhveshjes dhe ka takuar gjithë ekipin, duke u premtuar edhe një shpërblim të majmë për fitoren në derbi.
Presidenti i Partizanit, Gaz Demi, është larguar nga stadiumi i irrituar. Mësohet se presidenti i të kuqve ka lënë stadiumin në minutën e 84-t të takimit, shumë i nervozuar.
Banderolat kanë qenë të shumta dje. “Make Tirona great Again”. “Tirona Republikë”, “Tirona droga ime”. Në krahun bardheblu, Tirana kishte menduar koreografinë “Një shekull” dhe 1920. Nga ana e të kuqve, është hapur një banderolë e “Ultras Guerrils”. Gjithsesi, koreografitë e dy krahëve janë prishur nga mungesa e tifozëve në stadium, për shkak të rregullit të policisë që të gjithë duhet të futen me kartë identiteti.
Festa e bardhebluve është zhvendosur nga fusha e “Air Albania” në dhomat e zhveshjes, aty ku 24 herë kampionët e Shqipërisë kanë bërë ritualin e zakonshëm të fotos së përbashkët pas çdo fitoreje. Me dorën e hapur, fanellën me numrin 55 të Idriz Bathës, protagonistit që përmbysi ndeshjen dhe numrin 5 në tabelën elektronike, skuadra bardheblu i gëzohet pa masë shkatërrimit të rivalëve të kuq me 5 gola.