Koronavirusi, FSHF apel klubeve: Ja masat e nevojshme
“Ndeshje pa tifozë, stafet me maska dhe doreza”
Situatë pandemie në të gjithë botën. Sipas OBSH-së, përhapja e Koronavirusit ka marrë përmasa globale, dhe për pasojë, edhe në vendin tonë është një situatë e pazakontë. Teksa është vendosur që ndeshjet e futbollit të luhen pa tifozë, FSHF me anë të Komitetit të Emergjencës ka publikuar edhe planin e masave që duhet të ndjekë çdo skuadër në vijimësi. Që nga përdorimi i dorezave dhe maskave për stafet, dezinfektimi i ambienteve stërvitore dhe i stadiumeve si edhe marrja e masave për të luajtur takimet me dyer të mbyllura dhe të shmangen shtrëngimet e duarve mes ekipeve në start të takimeve. Jo vetëm kaq, por FSHF ka publikuar edhe planin e masave për të reduktuar stafin në zyrat e saj, si dhe ka bërë thirrje që të gjitha marrëdhëniet e mediave dhe të klubeve me institucionin e futbollit të kryhen me anë të telefonatave ose shkëmbimeve të postës elektronike.
Ja plani i pasave publikuar nga Komiteti i Emergjencave në FSHF:
Komiteti i Emergjencës në Federatën Shqiptare të Futbollit ka ndjekur me kujdes dhe nga afër situatën e krijuar në vendin tonë pas shfaqjes së rasteve të prekura nga virusi COVID-19. Menjëherë i është përgjigjur urdhrit të Ministrisë së Shëndetësisë dhe Mbrojtjes Sociale për të evituar grumbullimet publike dhe duke i zhvilluar ndeshjet me dyer të mbyllura.
Komiteti i Emergjencës bën me dije stafin e Federatës së Futbollit, klubet e futbollit, akademitë, futbollistët dhe të gjithë organizatorët dhe zyrtarët e ndeshjeve se janë të detyruar të zbatojnë me përpikmëri dhe përgjegjësi vendimet e mëposhtme.
1. Në Federatën e Futbollit në Tiranë, si dhe në të gjitha zyrat e saj në territorin e Republikës së Shqipërisë hyjnë në fuqi këto masa në mënyrë të menjëhershme:
a) Nis reduktimi i përkohshëm i stafit në zyra. Punonjësit do të paraqiten me rrotacion (nga një punonjës për secilën zyrë, për të mundësuar vijimësinë e punës) dhe uljen në minimum të kontakteve dhe shkëmbimeve virale. Do t’i jepet përparësi kryerjes së detyrave përmes telefonit dhe internetit;
b) Punonjëset femra me
fëmijë do të punojnë nga shtëpitë;
c) Hyrjet dhe daljet në Federatën e Futbollit do të limitohen për personat e jashtëm; çdo punë mundësisht të kryhet me telefon dhe e-mail dhe paralelisht nëse duhet ndonjë takim i detyrueshëm me qytetarët nga jashtë institucionit, punonjësi përkatës që do të jetë në zyrë do të takohet me qytetarin jashtë mjediseve;
d) Çdo pjesëtar i stafit që do të ketë shqetësime duhet të informojë dhe do t’i kërkohet të vetizolohet në shtëpi;
e) Të gjithë punonjësve u
kërkohet të jenë në kontakt të përhershëm me autoritetet shëndetësore;
f) Federata e Futbollit do të bëjë dezinfektimin e të gjitha zyrave dhe ambienteve të punës;
g) Të vijojë vendosja e dezinfektuesve të duarve në të gjitha mjediset e punës së FSHF.
2. Lidhur me pjesën e grumbullimeve stërvitore, ndeshjeve futbollistike etj., sipas protokollit të OBSH-së dhe rekomandimit të mjekëve, duhen ndjekur dhe zbatuar udhëzimet e mëposhtme në mënyrë rigoroze:
a) Të gjitha ndeshjet futbollistike do të vijojnë të luhen me dyer të mbyllura. Kërkojmë mirëkuptimin e sportdashësve tanë që të mos i vizitojnë ambientet sportive;
b) Të merren masa nga të gjitha klubet që gjatë grumbullimeve stërvitore dhe ndeshjeve të evitohen kontaktet fizike;
c) Të merren masa nga të gjitha klubet që të dezinfektohen të gjitha ambientet stërvitore, fushat dhe stadiumet, pra të gjitha dhomat ku ekipet, stafet dhe zyrtarët e ndeshjeve do të akomodohen;
d) Të vendosen dezinfektues duarsh në të gjitha këto mjedise për t’u ardhur në ndihmë futbollistëve, stafeve dhe zyrtarëve;
e) Të gjitha stafet të qëndrojnë me maska dhe doreza gjatë punës;
f) Përdorimi i maskave dhe dorezave është i detyrueshëm sidomos gjatë udhëtimeve të ekipeve, pra në autobusë, në furgonë dhe çdo grumbullim tjetër të detyrueshëm në vende të mbyllura;
g) Ashtu siç tashmë kemi modele nga futbolli ndërkombëtar, futbollistët dhe stafet të mos kenë fare kontakt fizik,
të tipit të dhënies së duarve në fillim të takimit, gjatë apo edhe në fund.
h) Stafet mjekësore të klubeve dhe akademive të jenë në kontakt të pandërprerë me autoritetet mjekësore të zonave përkatëse lidhur me raste të mundshme apo të dyshuara. Çdo rast, qoftë edhe i një simptome gripi të lehtë duhet raportuar dhe ndjekur me kujdes.
3. FSHF ka anuluar të gjitha mbledhjet publike, seminaret, workshop-et dhe konferencat e shtypit. Kërkojmë mirëkuptimin e klubeve, gazetarëve dhe bashkëpunëtorëve tanë. Komunikimi me ta do të vijojë i pandërprerë përmes telefonit dhe internetit.
4. FSHF u bën thirrje të gjithë futbollistëve dhe stafeve teknike të evitojnë udhëtimet personale jo të domosdoshme brenda vendit dhe sidomos jashtë vendit (sidomos drejt zonave të deklaruara zyrtarisht si të prekura nga virusi) dhe të reduktojnë takimet apo kontaktet që mund të rrezikojnë shëndetin e tyre dhe personave përreth tyre”, shkruhet në faqen zyrtare të FSHF-së për planin e masave në lidhje me këtë situatë emergjente.