Situata e virusit, anulohen miqësoret e U-19 me Kosovën

Nëse është vendosur që ndeshjet e futbollit në kampionat do të luhen sipas kalendarit, vetëm se pa praninë e tifozëve, FSHF dje ka publikuar edhe masat dhe vendimet e ndërmarra për ekipet kombëtare të moshave. “Komiteti i Emergjencës në Federatën e Futbollit, në vlerësim të situatës së fundit të krijuar në vendin tonë dhe në vijim të konsultimeve me specialistët përkatës, ka vendosur anulimin e grumbullimeve dhe sfidave miqësore që ishin planifikuar për kombëtaret e moshave, si më poshtë: Kombëtarja U–15 për një grumbullim rutinë mes datave 16-20 mars; Kombëtarja U-19, për grumbullimin në Shqipëri në datat 24-31 mars 2020, lidhur me dy ndeshjet miqësore me Kosovën. Ndeshjet ishin parashikuar të luheshin në datat 29 dhe 31 mars 2020 dhe ky vendim merret në mirëkuptim me Federatën e Futbollit të Kosovës; Kombëtarja U-20 për një grumbullim rutinë dhe miqësore me ekipet brenda Shqipërisë mes datave 25-30 mars 2020”, ka bërë me dije Federata Shqiptare e Futbollit lidhur me axhendën e ekipeve kombëtare të moshave. Këto masa kanë ardhur në lidhje me ndeshjet miqësore ose grumbullimet rutinë.