Vllaznia ia ka marrë dorën Flamurtarit

Vllaznia do të përballet të shtunën në orën 14:00 në Vlorë me Flamurtarin për të pestën herë këtë sezon. Përveç dy fazave të para të kampionatit, kuqeblutë kanë luajtur me Flamurtarin edhe dy ndeshje të vlefshme për turin e parë të Kupës së Shqipërisë. Shkodranët janë kualifikuar për më tej, pikërisht pas barazimit 2-2 në stadiumin “Loro Boriçi” në ndeshjen e parë, si dhe fitores 0-2 në Vlorë në sfidën e kthimit. Ndërkohë, në fazën e parë të kampionatit, shkodranët mposhtën Flamurtarin në Vlorë me shifrat 1-3, ndërsa në fazën e dytë në “Loro Boriçi”, sërish kuqeblutë fituan me shifrat 2-0. Vllaznia do të kërkojë fitoren e katërt sezonale dhe të tretën në fushën e stadiumit “Flamurtari” të Vlorës të shtunën, në një ndeshje ku shkodranët janë të dënuar të marrin tri pikë edhe prej pozicionit në tabelë.