Laçi, Cungu me sytë nga infermieria

Laçi është kthyer në shtëpi nga transferta kryeqytetase me zero pikë. Duke parë që skuadra kërkon të luajë medoemos në Europë, kurbinasit duan që të fitojnë me Teutën, një rival direkt për vendin e tretë. Duke ditur që Laçi nuk është në kupë, kampionati është rruga e vetme për skuadrën e Armando Cungut. Dhe pikërisht në rrugën europiane është Teuta në fundjavë. Skuadra kurbinase në kryeqytet vuajti mungesat e Toros, Gjonit, Nuabuezes. Të gjithë këta lojtarë pritet të kthehen në ekip për arsyen e vetme që një tjetër gabim do t'i kushtonte shumë ekipit kurbinas. Aktualisht, Laçi është në vendin e tretë me 41 pikë, duke qenë pretendenti kryesor për të luajtur nga kampionati në Europë. Skuadra e Cungut këtë sezon ka kaluar shumë peripeci, ndërsa një nga goditjet e forta ka qenë eliminimi nga Kupat e Europës.