Koronavirusi, Egnatia dezinfekton stadiumin
Ambientet e stadiumit të klubit Egnatia "Hasan Zyla" janë dezinfektuar ditën e djeshme për të parandaluar përhapjen e epidemisë së Koronavirusit. Klubi përmes një njoftimi në faqen e "Facebook"-ut ka pasqyruar se Bashkia e Rrogozhinës urdhëroi dezinfektimin e hapësirave të stadiumit të qytetit. Tek Egnatia nuk kanë frikë, por me dezinfektimin tregojnë kujdesin e tyre. Në Rrogozhinë kanë nisur të bëjnë llogaritë për sfidën e radhës me Veleçikun, që do të luhet në transfertë. Prej të martës grupi i lojtarëve ka nisur përgatitjet anti-Veleçik nën drejtimin e stafit. Trajneri Bano e ndihmësit e tij kanë përgëzuar titullarët për fitoren e fundit me Dinamon, pas së cilës u zhvillua një analizë e shkurtër, bosht i së cilës ishte vlerësimi i kundërshtarëve. Me një program të detajuar secili nga lojtarët po merr ngarkesat gjithëpërfshirëse në ambientet e stadiumit. Për gati pesë javë radhazi, portieri i rrogozhinasve, Klevis Hasanbelli, nuk ka pësuar gol, ndërkohë që të gatshëm për Egnatian në çdo moment janë edhe dy gardianët e tjerë Varfi e Memolla. Të tre portierët stërviten me mjaft përkushtim nga përgatitësi Arianit Ballhysa.