Besa s’dorëzohet, Kashami: Gati të mundim Pogradecin

“Luajmë pa presion, nuk kemi asgjë për të humbur”

Takimi i parë i “play off”-it do të përballë kavajasit këtë fundjavë me Pogradecin kryesues. Besa duket të jetë larg synimit të vendit të parë, që të çon direkt në Superiore. Gjithsesi, bazuar në rregulloren e këtij sezoni edhe një vend i dytë do t’i rezervonte një shans nëpërmjet dy sfidave me vendin e 2-të të Grupit A, e më pas finalen me vendin e 8-të të Superiores. Presidenti Bizhdili, ditë më parë e tha hapur se synon që ekipi i tij të renditet i dyti në Grupin B, pas 6 ndeshjeve që do të luhen. Në këtë linjë është edhe trajneri Ndriçim Kashami, që debutoi në premierën e tij me fitore në “finalen” për vendin e katërt, të luajtur në Devoll. “Gjendja në ekip është mjaft optimiste. Futbollistët janë të gjithë të gatshëm me përjashtim të Xhafës, që ende ka pak probleme. Kemi vijuar punën normalisht, pavarësisht situatës për shkak të virusit “Covid-19”. Deri më sot, nuk kemi asnjë shqetësim lidhur me këtë problem. Po përgatitemi për një ndeshje të vështirë ndaj një kundërshtari që e njohim mjaft mirë, e që na ka mundur vetëm disa javë më parë”,tha Kashami, sipas të cilit kjo është një përballje ku presioni bie i gjithi mbi Pogradecin. “Ne si Besë nuk kemi asgjë për të humbur, çfarë do të thotë se ekipi do luajë lirshëm pa presion. Bazuar edhe në objektivin afatshkurtër që na ka vënë presidenti, synimi ynë i vetëm është fitorja. Pogradeci mbetet ekip

i vështirë dhe këtë na e tregoi teksa na mundi disa javë më parë në Peqin. Do luajmë përsëri po në Peqin dhe duke e njohur tashmë Pogradecin, besoj se synimi i fitores mbetet alternativë plotësisht e arritshme nga ana jonë”, përfundoi trajneri Kashami.