Tuhel: Luajtëm si skuadër, më vjen keq për Borusian

Gjermani, i kënaqur me fitoren ndaj ish-ekipit të tij

Trajneri i skuadrës së Parisit, Tomas Tuhel, u shpreh se ishte i lumtur për këtë fitore të skuadrës së tij, ndaj një kundërshtari që ia kishte bërë të vështirë jetën në takimin e parë. "Bëmë atë që duhet të bënim edhe në Dortmund, të luanim si skuadër. Kjo ndodhi sot (dje). Jam shumë i lumtur që drejtoj këtë skuadër me lojtarë të mëdhenj, ata treguan se mund të bëjnë gjëra të mëdha nëse luajnë të bashkuar. Atmosfera para ndeshjes ishte me të vërtetë spe- ciale, tifozët treguan se janë pranë ekipit edhe pse nuk mund të ishin prezent në shkallët e stadiumit. Kjo na dha shumë zemër", tha Tuhel që foli edhe për ish-skuadrën e tij. "Borusia bëri shumë mirë në ndeshjen e parë, mendova se do të ishte më kërkuese sot, më vjen keq për eliminimin por futbolli i njeh të gjitha. Ata kanë një skuadër të mirë dhe këtë po e tregojnë edhe në kampionat, ku pas Bajernit janë skuadra favorite për të fituar titullin", tha gjermani. Në fund, tekniku i PSG-së foli edhe për kundërshtarët e mundshëm në çerekfinale. "Do të shohim, por në këtë fazë të gjithë kundërshtarët janë të fortë, pa përjashtim. Ne duhet të luajmë njësoj siç kemi bërë ndaj Borusias sot (dje), të mos harrojmë se kishim edhe disa mungesa të rëndësishme", përfundoi trajneri.