Xhaka luan në Frankfurt pa tifozë, mbyllen dyert edhe për LASK-Junajtid
Ndërsa Kamberi me Rejnxhërsat do të luajë me tifozë
UEFA u është dorëzuar masave ekstreme të marra në Itali dhe Spanjë për të shtyrë dy takimet Inter-Getafe dhe Sevija-Roma, por ndërkohë dje janë lajmëruar edhe mbyllja e dyerve në disa stadiume të tjera, në të cilat sot do të luhet për Ligën e Europës. Kaosi i Koronavirusit tashmë po prej edhe qeverinë e futbollit europian, aq sa orë pas orë po ndërmerren veprime dhe vendime, që duket se nuk janë aq shumë të qarta edhe për vetë ata. Gjithsesi, zyrtare nga pasditja e djeshme janë se Bazeli i Taulant Xhakës, i cili do të luajë sot në Gjermani, kundër Frankfurtit, për 1/8-at e Ligës së Europës, do të zbresin në fushë në një stadium ku nuk do të lejohet prania e tifozëve. Ndërkohë, i njëjti vendim është marrë edhe për duelin në Austri mes LASK-ut dhe Mançester Junajtid. Dyer të mbyllura do të ketë edhe në Greqi, në sfidën mes Olimpiakosit dhe Uolvesit, por ndërkohë dyert e hapura pritet të jenë në Skoci. Për sfidën mes Rejnxhërsave dhe Bajer Leverkusenit, nuk ka një urdhër për ndeshje pa tifozë, ndonëse në orët në vazhdim situata mund të ndryshojë. Në radhët e Rejnxhërsave që kujtojmë se drejtohen nga legjenda e Liverpulit, Stivën Xherrard, bën pjesë edhe sulmuesi shqiptar, Florian Kamberi, blerja e madhe e janarit e skuadrës nga Glasgou. Gjithsesi, sipas lajmeve që vijnë nga media skoceze, futbollisti kuqezi pritet ta nisë duelin e sotëm ndaj Leverkusenit nga pankina, ndonëse gjatë ndeshjes mund të ketë minuta të rëndësishme.