Koronavirusi, shtyhet ndeshja Siti-Arsenal
Deri të premten mbyllen në shtëpi, por nuk kanë asnjë simptomë
Ndeshja e prapam betur e Premier Ligës mes Mançester Sitit dhe Arsenalit në program për t’u zhvilluar në orën 20:30 të ditës së mërkurë është shtyrë për shkak të frikës së Koronavirusit.
JA PËRSE – “Vendimi, thuhej në deklaratën e klubit të Arsenalit, - u mor si masë paraprake dhe me këshillën e mjekëve, pasi u zbulua se disa prej pjesëtarëve të klubit të Arsenalit ishin në kontakt me pronarin e Olimpiakosit, Evangjelos Marianaqis, i cili rezultoi pozitiv ndaj Covid-19, gjatë ndeshjes së Ligës së Europës më 27 shkurt. Rreziku për t’u infektuar gjithsesi mbetet gjithsesi i ulët. “Pavarësisht kësaj, ne po ndjekim me rigorozitet linjat e udhëzimeve të qeverisë që ia rekomandojmë kujtdo që ka pasur kontakt të ngushtë me dikë të infektuar, që të vetëkarantinohet në shtëpi për 14 ditët e ardhshme nga hera e fundit që ka pasur kontakte”. Skuadra e Olimpiakosit dhe ajo e Notingem Forestit, klubit të Championship-it ku Marianaqis është gjithashtu president, iu nënshtrua analizave dhe fatmirësisht nuk rezultoi asnjë rast pozitiv.
VETIZOLOHEN 4 PERSONA – Katër pjesëtarë të stafit të Arsenalit, të cilët ishin ulur pranë Marianaqisit në tribunë gjatë ndeshjes, do të vetizolohen për 14 ditë. Arsenali nuk saktësoi se sa futbollistë mund të ishin të rrezikuar, por ndeshja e së shtunës kundër Brajtonit nuk është në rrezik. “Topçinjtë” njoftuan se do të qëndrojnë në karantinë deri të premten, kur edhe do të nisin përgatitjen për ndeshjen kundër Brajtonit, 24 orë më vonë. Klubi ka marrë masa urgjente për të dezinfektuar stadiumin “Emirates”, ku biznesmeni grek ishte i pranishëm 14 ditë më parë dhe vizitoi edhe ambientet e brendshme të tij, deri në dhomën e zhveshjes, ku festoi kualifikimin me lojtarët e tij. Restoranti, tribuna VIP, por edhe tuneli janë gjithashtu ambientet ku Marianaqis ka shkelur. Klubi i Arsenalit tha se është optimist se pas periudhës së vetizolimit, askush nuk pritet të ketë probleme dhe deri tani nuk ka asnjë simptomë.