Ndalohen picat dhe ruani higjienën

Shoqata e Futbollistëve Profesionistë në Angli u ka dorëzuar futbollistëve një manual prej 12 pikash për t’u ruajtur nga infektimi me Koronavirus. Kujdes maksimal me higjienën personale dhe nuk ka më pica pas ndeshjeve (një rutinë e zakonshme e futbollistëve në dhomat e zhveshjes).

1. Mos pini nga e njëjta shishe uji gjatë ndeshjes apo në stërvitje, por gjithnjë përdorni një shishe uji të personalizuar dhe mos shkëmbeni sende të tjera (peshqirë, peshqirë trupi etj.) me lojtarët e tjerë.

2. Shmangni ngrënien e ushqimit në dhomën e zhveshjes.

3. Mbajini sendet personale dhe rrobat në çantë dhe shmangni lënien e atyre në dhomat e zhveshjes apo koshat e përbashkët.

4. Flakni pecetat e përdorura apo materialet e tjera të përdorura si leukoplaste, fasho, menjëherë në koshat e përshtatshëm të mbyllur.

5. Lani duart sa më mirë dhe shpesh që të jetë e mundur: larja e duarve dhe dezinfektimi janë thelbësore për të parandaluar infektimin. Lani duart me sapun dhe ujë për të paktën 20 sekonda dhe më pas thajini me një peshqir pasi i keni shpëlarë mirë. Nëse sapuni dhe uji nuk janë të disponueshëm, atëherë mund të përdorni gjithashtu një dezinfektues duarsh.

6. Kur përdorni tualete të zakonshme, nuk duhet ta prekni çezmën përpara dhe pasi të keni larë duart, por përdorni peshqirë njëpërdorimsh për të hapur dhe mbyllur çezmën.

7. Mos prekni sytë, hundën apo gojën me duar të papastra.

8. Nëse keni kollë apo teshtima, mbuloni gojën dhe hundën me një pecetë (preferohet njëpëdorimshe) ose me krah, por jo me duar.

9. Lojtarët që shfaqin simptoma të infeksioneve respiratore apo temperaturë përpara, gjatë apo pas stërvitjes duhet të largohen menjëherë nga pjesa tjetër e skuadrës, të vetizolohen nëse është e mundur dhe informojnë doktorin e klubit.

10. Nëse simptomat shfaqen jashtë stërvitjes, lojtarët duhet të shmangin të gjithë kontaktet dhe takimet me shokët e tjerë të skuadrës dhe të vetizolohen nëse është e mundur. Lojtarët duhet të kontaktojnë doktorin e klubit me telefon ose të telefonojnë urgjencën. Për të mbrojtur veten dhe të tjerët mos shkoni vetë në një qendër shëndetësore, farmaci apo spital.

11. Nëse lojtari ka qenë në kontakt personalisht me ndonjë person që sapo është kthyer nga zonat e rrezikut apo karantina, ata duhet të informojnë menjëherë lojtarët e tjerë dhe zyrtarët e klubit.

12. Nëse ke qenë vetë në zonën e riskut, duhet të informosh menjëherë lojtarët e tjerë dhe zyrtarët e klubit.