Gabiadini pozitiv, izolim për Kumbullën e Rrahmanin
Verona u përball në Serinë A, 14 ditë karantinë për të gjithë
Pas Daniele Ruganit, në Serinë A është konfirmuar një rast i prekuri nga Koronavirusi. Bëhet fjalë për Manolo Gabiadinin, futbollistin e Sampdorias. Dje është bërë publik lajmi në lidhje me rezultatin pozitiv, pasi futbollisti rezulton i prekur me COVID-19. Një lajm i tillë vjen vetëm pesë ditë nga përballja e tij me ekipin e shqiptarëve në Serinë A. Për pasojë, skuadra e Veronës në Serinë A është vendosur në karantinë për 14 ditë. Masa të tilla izolimi edhe për dy shqiptarët, Marash Kumbulla dhe Amir Rrahmani.
KARANTINA
Në bazë të protokollit të masave që duhen ndërmarrë, dy lojtarët shqiptarë të Veronës do të duhet të qëndrojnë të izoluar nën masa të rrepta shëndetësore dhe kontrolli të specializuar. Bashkë me të gjithë skuadrën e Veronës, duke përfshirë futbollistë, pjesëtarë të stafit teknik, ndihmësit dhe punonjësit rreth ekipit, do t’u nënshtrohen të njëjtave kushte, meqenëse vetëm 5 ditë më parë janë përballur me Sampdorian. Më tetë mars, Verona dhe Sampdoria zhvilluan mes tyre ndeshjen e javës së 26-të të Serisë A, në fushën e Sampdorias dhe përfundoi me fitoren 2-1 të vendësve.
ITALIA
Pasi zona e Lombardisë ishte më e prekura në Itali, prej disa ditësh, e gjithë Italia do të jetë nën regjimin strikt të karantinës. Shteti përtej Adriatikut u është nënshtruar masave të rrepta të izolimit, teksa janë mbyllur kufijtë dhe është kufizuar rreptësisht lëvizja e shtetasve italianë brenda territorit.