Novi: Ndërprerja vendim i drejtë, shëndeti është para futbollit
Teksa Luftëtari i drejtuar nga trajneri Neritan Novi ishte duke u dhënë dorën e fundit përgatitjeve për sfidën e sotme me Kukësin në kampin bluzi pak minuta se trajneri të dilte në konferencën për shtyp nga FSHF-ja mbërrin lajmi i ndërprerjes së garës deri në një afat të dytë. Trajneri Neritan Novi, teksa u njoh me këtë fakt për “Panorama Sport” bëri të ditur lajmin e shpërndarjes së skuadrës deri ditën e hënë. “Paraditen e djeshme vijuam normalisht përgatitjet për ndeshjen me Kukësin me opsion shpalosjen e lojës tonë më të mirë. Të gjithë lojtarët për ndeshjen e sotme ishin të gatshëm në shërbim të skuadrës për të marrë më të mirën nga takimi. Për më shumë se 90 minuta punuam me lojtarët për të korrigjuar dobësitë në ndeshjen e fundit, edhe pse ndaj Bylisit zhvilluam lojë të mirë”, u shpreh fillimisht Novi. Moszhvillimi i javës së 27-të, sipas Novit,
erdhi në kohën e duhur, falë dhe vendimit perfekt të FSHF-së. Novi lidhur me këtë vendim për “Panorama Sport” u shpreh: “Pas konsultimeve me presidentin e skuadrës, Bekim Halilaj, morëm vendimin e shpërndarjes së ekipit deri ditën e hënë. Nuk mund të vazhdonim stërvitjen bashkë, pasi mbi futbollin është jeta e lojtarëve, e të gjithëve. Një masë e drejtë e ndërmarrë nga institucioni i futbollit, e ardhur në kohën e duhur dhe për më shumë në pikën më të ndjeshme të epidemisë së Koronavirusit që pushtoi vendin tonë. Pavarësisht ndërprerjes së kampionatit, lojtarëve ua kemi bërë të ditur programin stërvitor deri në detaje, të cilin duhet ta zbatojnë me përpikëri në shtëpi. Për gjithsecilin kemi ndarë programe pune me qëllim vijimësinë e përgatitjeve për të mbajtur gjallë frymën e grupit dhe situatën e postndeshjes me Bylisin. Jemi në pritje të një urdhri të dytë, në pritje të kalimit me sa më pak pasoja të Koronavirusit në vendin tonë dhe gjithë botën. Shëndeti mbi të gjitha, më pas futbolli”. Luftëtari në ndeshjen e planifikuar për t’u luajtur sot ndaj Kukësit pritej të ishte i kompletuar, teksa nuk kishte lojtarë të skualifikuar dhe të dëmtuar.