Shumë lojtarë nga qytete të tjera, Besa në “karantinë
Vendimi i fundit i FSHF-së për pezullimin e të gjitha aktiviteteve të futbollit në vend ka bërë që Besa në njëfarë mënyre të futet në “karantinë”. Sipas trajnerit Ndriçim Kashami, janë njoftuar të gjithë futbollistët që të mos paraqiten në fushën e stërvitjes të paktën deri të martën. “Pasi u njohëm me vendimin e fundit të FSHF-së për ndërprerjen e kampionateve, vendosëm bashkë me presidentin Nexhat Bizhdili që të evitojmë grumbullimin e skuadrës për stërvitje. Ata që udhëtojnë nga Tirana, Peqini, Durrësi, Shijaku, Shkodra dhe Fieri, nga ku i kemi futbollistët, nuk duhet ta bëjnë këtë gjë për disa ditë. Më tej, bazuar në situatën që do të ndodhemi, do të marrim të tjera vendime”, ka thënë për gazetën trajneri Kashami. Kavajasit në fakt kanë mbi 90% të futbollistëve nga qytete të tjera dhe ata nuk mund të udhëtojnë në këtë situatë çdo ditë, pas vendimit të fundit të qeverisë. Besa që vetëm në javën e fundit e siguroi katërshen e parë, e nis fazën e “play off”-it me Pogradecin kryesues. Kavajasit kanë shanse minimale për Superioren, por presidenti Bizhdili ka shpallur si objektiv vendin e dytë që mundëson pjesëmarrjen në ndeshjet shtesë. Gara mbetet shumë e fortë, sepse Besa ka tre rivalë përpara, Pogradecin, Apoloninë dhe Lushnjën. Për më tepër, kanë mbetur edhe 6 ndeshje për t’u zhvilluar dhe vendi i dytë është 10 pikë larg.