“Suning” dhe Inter, 300 mijë maska Mbrojtjes Civile
Ndërkohë që Italia ka ndërprerë kompeticionet për t’i bërë ballë infektimit nga Koronavirus, Interi dhe “Suning” kanë zbritur në fushë përkrah Mbrojtjes Civile për të mbrojtur autoritetet në luftën kundër emergjencës. Klubi zikaltër ka vendosur t’i dhurojë 300 mijë maska për përdorim mjekësor dhe produkte të tjera sanitare, mes veshjeve mbrojtëse dhe produkteve për dezinfektimin. “Shpresojmë që eksperienca e suksesshme në Kinë të mund të na ndihmojë që të përballojmë përhapjen e virusit në Itali”, ka shpjeguar presidenti i Interit dhe djali i kreut të “Suning”, Stiven Zhang, i cili është falënderuar për gjestin edhe nga Partia Demokratike italiane. Në këto momente emergjence, ndër të tjera, “Suning” do të vendosë në dispozicion të Italisë filialet globale. Gjesti i radhës i solidaritetit nga investitorët kinezë, që 5 marsin e kaluar i dhuruan 100 mijë euro klinikës “L.Sacco” të Milanos për të mbështetur aktivitetet e Institutit.