Leao: Ja çfarë ndodh kur më bërtet Zlatani
Ndoshta nuk ka dhënë atë që pritej nga një lojtar që kushton rreth 35 milionë euro, por ai është i vetëdijshëm se mund të bëjë dhe kontribuojë më tepër për ekipin e tij. Protagonisti i numrit të radhës së “Calcio2000”, Rafael Leao, ka folur për aventurën e tij milaniste dhe pritshmëritë me fanellën kuqezi. Dashuria për familjen dhe topin janë kryefjala e intervistës së tij e cila përfshin edhe tema lidhur me Milanin, shokët e ekipit dhe objektivat.
Si ka qenë kontakti juaj i parë me Milanin?
Fillimisht nuk më besohej, por më pas fola me Paolo Maldinin dhe isha shumë i lumtur. Një legjendë e futbollit botëror më kishte kontaktuar. Ato kanë qenë momente që nuk do t’i harroj.
Si ndiheni në këtë klub?
“Ndihem shumë mirë te Milani dhe jam krenar që jam pjesë e kësaj skuadre e që mbaj këto ngjyra. Do t’i jem ngaherë mirënjohës klubit që beson dhe mbështetet tek unë dhe do të mundohem të shpërblej gjithçka kanë bërë për mua.
Me cilin nga bashkëlojtarët keni lidhur më shumë shoqëri?
“Që në fillim kanë qenë të shumtë shokët që më kanë ofruar ndihmën e tyre dhe shkoj mirë me të gjithë, veçanërisht me Benaserin, Paketanë, Kesin dhe Çalhanoglunë. Sigurisht mes tyre është edhe Ibra që më jep gjithmonë këshilla të vyera.
E keni frikë Ibrahimoviçin kur ju bërtet?
Kemi 18 vjet diferencë me Zlatanin, por mosha nuk është problem e nuk trembem kur më bërtet. E di se e bën për të mirën time e kërkon që unë të përmirësohem e të rritem profesionalisht. E di që duke ndjekur udhëzimet e tij do jem një futbollist më i mirë. Stërvitjet krah tij çdo ditë përbëjnë një avantazh të madh.
Cilët janë objektivat tuaj me fanellën kuqezi?
Që të mbyllim sa më mirë sezonin e të fitojmë sa më shumë nga ndeshjet e mbetura. Duam t’u dhurojmë kënaqësi tifozëve që nuk na e kanë kursyer gjatë gjithë sezonit mbështetjen e tyre.