“Ibraventura”, paketa e re në drejtim të Napolit
Raiola punon të çojë Zlatanin dhe Xhekun te Napoli
Situata në Itali vazhdon të jetë kritike për shkak të viktimave që po shkakton Koronavirus, por ndalimi i lëvizjes së qytetarëve nuk ka ndaluar zërat e merkatos. Lajmet e fundit që vijnë nga vendi fqinj lidhen me një goditje të dyfishtë nga ana e Napolit. Sipas “Corriere dello Sport”, klubi jugor do të mbajë Mertens dhe ka afruar Andre Petanjën, por për të mundësuar rritjen e këtij të fundit po kërkon njëkohësisht edhe një sulmues me përvojë. Duke parë raportet e mira me Aurelio De Laurentisin, në valle ka hyrë Mino Raiola. Menaxheri thuhet të ketë propozuar Zlatan Ibrahimoviçin, i cili me sa duket nuk sheh kushtet e duhura për të vijuar raportin e tij me Milanin. Largimi i Zvonimir Bobanit dhe ai shumë i mundshëm i Paolo Maldinit i ka komplikuar ndjeshëm shanset e 38vjeçarit për të qëndruar kuqezi, ndaj menaxheri i tij studion terrenin për ta sistemuar gjetkë nëse dështojnë bisedimet me “Djallin”.
– Gjatë verës, Napoli mund ta gjejë veten në mesin e një eksodi sepse përveç Alan, edhe Kulibali, Gulam, Milik, Junes e Lozano përfliten për largim. Të gjithë nuk mund të zëvendësohen nga alternativa niveli, ndaj duhet studiuar edhe ndonjë profil me kosto të ulët. Në këtë situatë, menaxheri Raiola, përveç Ibrës, po mendon të propozojë edhe Xhakomo Bonaventurën. 30vjeçari nuk ka gjetur një akord për rinovimin e kontratës e në qershor mund të largohet falas kudo që dëshiron. Kjo marrëveshje mund të arrihet me bekimin e Xhenaro Gatuzos, i cili e vlerëson mesfushorin për cilësitë e tij brenda dhe jashtë fushës.
– Bisedimet për Ibrën dhe Bonaventurën janë ende në fazë fillestare, por raportet e tyre të ndërlikuara me Milanin mund të jenë një shtysë për t’i parë në sezonin e ardhshëm me fanellën e Napolit, ku mes shumë shokësh të rinj mund të gjejnë edhe shqiptarët Elseid Hysaj dhe Amir Rrahmanin, i cili bisedimet i ka mbyllur me kohë e në verë do të jetë ndër lojtarët e rinj nën urdhrat e trajnerit Gatuzo.