“Bundesliga rrezikon mbylljen përfundimtare”
Një situatë që nuk premton shumë për futboll mbizotëron edhe në Gjermani. Rastet që shtohen ditaditës kanë shqetësuar jo pak drejtuesit e federatës gjermane, ligën dhe pa dyshim klubet. Deri tani dy lojtarë kanë rezultuar pozitivë në Bundesligën e Dytë me dyshimin se mund të ketë edhe të tjerë në ditët në vazhdim. Fridrish Kurtius, sekretari i Federatës Gjermane së Futbollit deklaroi: "Duhet të mendojmë skenarët e mundshëm për t'i dhënë zgjidhje përfundimtare këtij sezoni. Sigurisht që anulimi i kampionatit është një mundësi, edhe pse është një masë ekstreme. Duhet të mendojmë në radhë të parë për shëndetin dhe më pas aktivitetin. Është koha që të tregohemi të kujdesshëm dhe të mos luajmë me shëndetin e qytetarëve gjermanë dhe ata që punojnë këtu. Fjalën e fundit, sigurisht, do ta kenë njerëzit e Ministrisë së Shëndetësisë", tha Kurtius për "Kicker". Një vendim që është përshëndetur nga klubet, edhe pse nuk dihet nëse ato janë për mbylljen përfundimtare të sezonit. Java e ardhshme në Gjermani do të luhet me dyer të mbyllura, po tifozët vazhdojnë të blejnë bileta virtuale, paratë e të cilave do të shkojnë për ndihmat e të prekurve si dhe kërkimeve shkencore për të gjetur një vaksinë.