Do të jetë pjesë e kampionatit të burgut, por Ronaldinjos i ndalohet goli

Ronaldinjo dhe vëllai i tij prej disa ditësh qëndrojnë në burgun e Asunsionit në Paraguai, pasi u ndaluan me pasaporta false nga autoritetet vendëse. Duke qenë se ish-kampioni brazilian është pjesë e burgut, ai tashmë do të marrë pjesë edhe në kampionatin e kalçetos që organizohet aty, ndonëse fillimisht drejtori i burgut e kishte mohuar diçka të tillë. Por Ronaldinjo nuk i ka bërë dot ballë tundimit dhe do të zbresë në fushë në këtë turne, në të cilin do të marrin pjesë 10 skuadra. Por sipas gazetarit Ivan Leguizamon, Ronaldinjo do të ketë një limitim të veçantë, pasi nuk mund të shënojë gol. Kështu, ish-ylli brazilian do të ketë mundësinë vetëm të shërbejë shokët e skuadrës, por kjo nuk mendohet të jetë një problem për Dinjon, i cili njihet edhe për asistet e mrekullueshme.