Javë vendimtare, UEFA mbledh nesër federatat

Kjo javë pritet të jetë vendimtare për fatet e çdo kampionati në Europë, por jo vetëm. Sipas një njoftimi që ka bërë vetëm dy ditë më parë FSHF, UEFA do të thërrasë në një mbledhje të jashtëzakonshme Komitetin Ekzekutiv dhe sekretarët e përgjithshëm të 55 federatave për të diskutuar mbi zhvillimet e fundit në lidhje me impaktin e shkaktuar nga pandemia Covid-19 në futbollin europian. "Komiteti Ekzekutiv do të mblidhet më datë 23 prill dhe kjo mbledhje do të jetë menjëherë pas sesionit informues me sekretarët e përgjithshëm të 55 federatave anëtare të UEFA-s që do të zhvillohet të martën më 21 prill. Takimi do të përqendrohet te planet për kompeticionet vendëse dhe kompeticionet europiane", citohej në njoftimin e FSHF-së. UEFA ka vendosur paraprakisht që federatat duhet t'i kenë mbyllur kampionatet kombëtare përpara datës 3 gusht. Gjithsesi, kjo mbetet për t'u parë.