“Lojtarët duhet të testohen”
"Pas rikthimit në stërvitje nevojiten kontrolle çdo 4 ditë, Covid-19 prek zemrën"
Stafet mjekësore të klubeve shqiptare duhet të jenë shumë të kujdesshme në kontrollin e futbollistëve pas rikthimit në fushë nga pauza e stërzgjatur prej përhapjes së Koronavirusit. Është ish-përgatitësi atletik i Kombëtares shqiptare, Alesandro Ciulini, ai që lëshon alarmin për atë që pritet të ndodhë me skuadrat pas rikthimit në fushë. Trajneri italian i atletikës që ka punuar në stafin e kuqezinjve në kohën kur Shqipëria drejtohej nga Kristian Panuçi, në një prononcim për të përditshmen italian, "La Repubblica", ka shpjeguar mënyrën se si futbollistët mund të jenë në gjendje normale pas dy muajsh karantine. Ciulini sqaron pse Koronavirusi do të lërë pasoja të mëdha, pasi prek zemrën dhe kjo e bën të detyrueshme një kontroll të imtësishëm, jo vetëm për ata futbollistë që kanë qenë pozitivë me Covid19 në këtë periudhë, por për të gjithë.
STËRVITJA
Alesandro Ciulini ka 25
vjet përvojë, duke punuar në klube italiane si Fiorentina, Salerintana, Leçe, Viçenca, Atalanta, Sasuolo, Rexhina, Benevento, si dhe te Livorno e Ternana ku bashkëpunoi me Kristian Panuçin. "Aspekti më i rëndësishëm, veçanërisht
për një trajner atletik, është intervali kohor midis stërvitjes dhe lojës, një fakt thelbësor për planifikimin e tërë programit. Gjatë karantinës kryesisht lojtarët përqendrohen në stabilitetin thelbësor, pra forcën dhe gjimnastikën.
Nga njëra anë, pjesa qendrore e trupit është forcuar, domethënë zonat e barkut dhe mesit, të cilat veprojnë si një bashkim midis gjymtyrëve të sipërme dhe të poshtme. Kjo është për të stabilizuar trupin, me ushtrime ku punohet në pozicione për të dhënë ekuilibër dhe forcë. Është një trajnim shumë i dobishëm", tregon ai.
RIKTHIMI
"Para së gjithash do të jetë e nevojshme të kryhen teste kontrolli për të kuptuar aftësinë e lojtarëve. Unë do të përqendrohesha në aspektin specifik të lojtarit, duke stimuluar dhe stërvitur ato lëvizje që ai nuk ishte në gjendje t'i bënte në shtëpi. Përshpejtimet, frenimet, ndryshimet e drejtimit, kontakti me topin etj. Pas rikthimit në fushë, ka një faktor si entuziazmi që mund të ndikojë për mirë te lojtarët dhe do të jetë më e lehtë për ta. Natyrisht, gjendja e përgjithshme fizike e ekipit nuk do të jetë e vërtetë, por lojtari do të ketë një dëshirë të madhe për të luajtur menjëherë", ka thënë ish-përgatitësi atletik i kuqezinjve.
EFEKTI
"Pas pandemisë globale, federata do të forcojë kontrollet me stafet mjekësore në klube. Këtu nuk bëhet fjalë vetëm për ata lojtarë që mund të kenë rezultuar pozitivë me Covid-19. Edhe për lojtarët që janë testuar dhe kanë rezultuar negativë, duhen bërë kontrolle çdo katër ditë. Ndërsa për ata që janë prekur nga Koronavirusi dhe e kanë kaluar, do të duhet t'i nënshtrohen një serie testesh për t'u vëzhguar më pas në një periudhë individuale të rimëkëmbjes graduale prej gati 15 ditësh. Vetëm atëherë mund të fillojnë stërvitjet normale, gjithmonë nën kontrollin e stafit mjekësor. Nga ajo që kuptoj, duke lexuar raporte të ekspertëve, virusi ndikon shumë në mushkëri dhe në zemër. Për këtë arsye mund të lërë shenja te një futbollist në të ardhmen. Tashmë mjekët duhet të kenë një vlerësim shumë më të saktë dhe për këtë arsye do të urdhërohet një ekzaminim i rreptë".