FSHF: Plane për të nisur në qershor, jo verdikt tavoline
Shulku: Komiteti Ekzekutiv do vendosë sipas situatës
FSHF nuk e mendon ende se mund të japë një kampionat në tavolinë, duke pranuar verdiktet që 10 javë para fundit të sezonit në Kategorinë Superiore apo pa u luajtur ende turi çerekfinal i Kupës së Shqipërisë. Mirëpo, fakti që nuk ka asnjë garanci se kur mund të rinisë gara në të gjitha nivelet e futbollit shqiptar, ky skenar mund të bëhet i besueshëm, edhe pse çdo gjë do të varet nga pandemia pas përhapjes së Koronavirusit. "Panorama Sport" ka mësuar se në FSHF kanë bërë llogari që deri në fund të qershorit të kenë mbyllur çdo aktivitet. Sektori i garave ka bërë një kalendar paraprak, që mbetet thjesht si ide.
SEKRETARI I PËRGJITHSHËM
10 klubet e Superiores janë njohur me disa propozime për rifillimin e kampionatit dhe këtë e ka konfirmuar në një intervistë për "Top Channel" edhe vetë sekretari i përgjithshëm i FSHF-së, Ilir Shulku. "U kemi dërguar klubeve disa variante për vazhdimin e kampionatit dhe datat e mundshme se kur mund të rifillojë, në mënyrë që më pas të vendosë Komiteti Ekzekutiv në FSHF. Gjithmonë do të veprohet në varësi të situatës. Pra, nëse ajo precipiton ose jo dhe kur do të dalim nga kjo gjendje. Nëse flasim për Superioren, kanë mbetur pa u zhvilluar 10 javë kampionat dhe gjithashtu 5 ndeshje në Kupën e Shqipërisë. Nuk e kemi parë si opsion dhënien e kampionatit në tavolinë. Kjo ndoshta mund të mendohet në një tjetër vendimmarrje, por për momentin ne shpresojmë që të dalim shpejt nga kjo situatë dhe kampionati të rifillojë dhe të mbyllet normalisht", ka thënë Shulku.
SHEFI I GARAVE
Shefi i sektorit të garave në
FSHF, Lysien Nurishmi, për "Neës 24" ka thënë se deri tani plani është që kampionatet e futbollit në Shqipëri, kryesisht Superliga, të fillojnë në fillim të qershorit dhe të përfundojnë në korrik. "Më e rëndësishmja është ta mbyllim në fushë kampionatin. Do të ishte më e mira, ajo është më e rëndësishmja. Do të ishte mirë të përfundonin në fund të korrikut. Më pas do të shohim edhe për rikthimin e tifozëve. Do të ishte perfekt që të mbyllej me tifozë. Për fillimin e kampionatit do të ishte mirë të mbyllej sa më shpejt sezoni, pasi kemi 4 skuadra që do të konkurrojnë në kompeticione europiane dhe ia lehtësojmë UEFA-s. Muaji gusht është vendimtar për këto
skuadra. Nuk kemi menduar për skenarin më të keq dhe nuk duam të mendojmë. Duam të rifillojmë në fillim të qershorit dhe të mbarojë në fund të korrikut. Të ndryshohet skema dhe të përfundohen edhe 10 ndeshjet e mbetura. Të gjithë kishim një mendim që qeveria do ta fuste futbollin në paketën financiare pasi është një numër i konsiderueshëm futbollistësh, staf. Duke parë që qeveria nuk e përfshiu, atëherë FSHF akordoi fondin 400 milionë lekë për t'i ardhur në ndihmë. Jemi një vend që nuk jemi rrezikuar si Italia, Spanja, Gjermania apo Belgjika, Franca. Megjithatë, UEFA do ta gjejë mundësinë që ky sezon të përmbyllet në fushë e lojës", tha Lysien Nurishmi.