Sindikata ngre zërin për klubet e bashkive

Sindikata e Futbollistëve Profesionistë ishte e para që i kërkoi me një shkresë zyrtare qeverisë të ndihmojë futbollin në këtë periudhë të vështirë. Përgjigjja ishte negative dhe më pas reagoi FSHF-ja me një pagë modeste, por edhe ajo jo për të gjithë klubet, sepse la jashtë klubet e financuara nga bashkitë. Edhe për këtë çështje ka reaguar Sindikata e Futbollistëve, duke publikuar një deklaratë në faqen e saj zyrtare. "Si fillim, e falënderojmë FSHF-në për atë që bëri, por kemi marrë shumë ankesa nga futbollistë të Kategorisë së Parë dhe të Dytë, të cilët kanë thënë se nuk janë paguar nga bashkitë dhe janë në vështirësi të mëdha ekonomike. Sindikata e Futbollistëve i kërkon FSHF-së të përfshihen në paketën e ndihmës edhe këta futbollistë, kontratat e të cilëve janë të depozituara pranë federatës", shkruhej mes të tjerash në deklaratën e sindikatës. Megjithatë, FSHF-ja nuk ka pasur ndonjë reagim pas kërkesës së sindikatës dhe duket se nuk ka ndërmend që të japë pagë për futbollistët e atyre skuadrave që financohen nga bashkitë. Drejtues të këtyre klubesh kanë reaguar dhe kanë pohuar për "Panorama Sport" se ndihma e FSHF-së nuk është ndarë në mënyrë të drejtë.