Zbulohet plani, Champions-i rinis më 7 gusht, do luhet çdo 3 ditë
UEFA vendos për mbylljen e sezonit 2019-'20 në Europë
UEFA ka bërë gati prezantimin e planit për mbylljen e sezonit të Ligës së Kampioneve, duke e zhvendosur kompeticionin më të rëndësishëm futbollistik për klube në kontinent nga data 7-31 gusht. Kjo do të bëjë që skuadrat do të luajnë çdo tri ditë në fazat e mbetura, deri në finalen e Stambollit më 29 gusht. Futbolli ka ndaluar sot në botë për shkak të pandemisë së Koronavirusit, ndërsa kompeticioni elitar i futbollit europian u ndërpre në fazën e 1/8-ave. UEFA do të ketë një takim mes ditës së martë dhe të enjte në mënyrë që të diskutohet se si do të mbyllet sezoni aktual mes kësaj krize të paprecedent. "Sky Sport Italia" ka zbuluar se plani për të mbyllur sezonin e kompeticioneve europiane është në muajin gusht, pasi klubet të kenë përfunduar kampionatet kombëtare respektive. Ndeshjet e kthimit të fazës së 1/8-ave, mes Lionit dhe Juventusit dhe Barcelonës dhe Napolit, do të luhen më 7 dhe 8 gusht. Pastaj takimet e fazave çerekfinale dhe gjysmëfinale do të vazhdojnë çdo tri ditë, me të njëjtin sistem, vajtje-ardhje deri në ditën e finales së madhe. Gjysmëfinalet do të luhen në datat 18-19 dhe 21-22 gusht, ndërsa finalja në Stamboll më 29 të po atij muaji. UEFA pritet të njoftojë edhe shtyrjen e nisjes së sezonit të ri 2020'21. Nisja e fazës së grupeve e Champions-it pritet të shtyhet më 20 tetor. Kampionët në fuqi të Liverpulit janë eliminuar nga Atletiko e Madridit në fazën e 1/8-ave, duke bërë që këtë sezon të kemi një kampione te re që do të ngrejë trofeun prestigjioz. Rinisja e Ligës së Europës është fiksuar në datat 2-3 gusht, me ndeshjet e vajtjes së 1/8-ave dhe ato të kthimit në datën 6. Çerekfinalet do të luhen në datat 10-13 gusht, gjysmëfinalet 17-20 dhe finalja që këtë sezon do të mbahet në Poloni në datën 27.