Vazhdojnë konfirmimet, Zidan drejt transferimit te Juventusi

Një lajm i bujshëm është duke qarkulluar në mediat franceze. Bëhet fjalë për të ardhmen e teknikut aktual të Real Madrid, Zinedin Zidan. Sipas "Le10sports.com", Juventusi ka nisur kontaktet me "Zizunë", duke e piketuar si zëvendësuesin e Mauricio Sarrit për sezonin e ardhshëm. Sipas po të njëjtit burim, Zidan, nuk po arrin të gjejë gjuhën e përbashkët me presidentin Florentino Perez, teksa divorci është shfaqur në horizont. Gjithashtu vlen të theksohet se Reali i Madridit nuk ka bindur këtë sezon, si në 3 sezonet kur me trajnerin dhe ish-fantazistin madrilen e bardhezi erdhën edhe 3 Champions-at radhazi. Francezi është një njohje e vjetër për klubin bardhezi, pasi është aktivizuar si futbollist me Juventusin nga viti 1996 deri në 2001-shin. Ish-mesfushori ka një kontratë me Realin e Madridit deri në qershor të vitit 2022, por për shkak të raporteve jo fort pozitive, bashkëpunimi me shumë gjasa do të ndërpritet në fund të sezonit. Ndërkohë në Torino, "Zizu" do të rigjente Kristiano Ronaldon, me të cilin ka një marrëdhënie speciale. 47-vjeçari njihet si specialist i Ligës së Kampionëve, trofe ky që kërkohet me ngulm nga "Zonja e Vjetër", prej shumë vitesh dhe të cilin Zinedin Zidan e ka fituar jo vetëm si futbollit, por edhe si trajner, duke lënë gjithmonë shenjën në fushën e lojës.