Milani i vë syrin Szoboszlait, “shkuesi” mund të bëhet Rangnik
Mesfushori hungarez kushton rreth 30 milionë euro
Në merkaton e ardhshme të verës, Milani do të përqendrohet shumë në repartin e mesfushës, ndoshta në sektorin më të dobët të skuadrës aktuale. Sandro Tonali mbetet objektivi kryesor, por që sigurisht nuk është i vetmi profil prezent në dosjen kuqezi. Sipas "Tuttosport", mes lojtarëve që ngacmojnë më shumë interesin e drejtuesve të "Djallit' është i riu Dominik Szoboszlai, talenti në pronësi të austriakëve të Salcburgut.
Mesfushori hungarez i datëlindjes 2000, është një prej talenteve më të interesuar në panoramën europiane. Për të, ka klube të ndryshme si Liverpuli, Arsenali, Dortmundi dhe Lajpcigu që shfaqin interes, por edhe Milani që e ka një profil që përshtatet në mënyrë perfekte me parametrat e vendosura nga administratori Gazidhis: i ri, me perspektivë dhe mundësi rishitjeje për çmim më të lartë.
- Klubi kuqezi mund të përfitojë nga faktori "Rangnik" dhe ndikimi i menaxherit gjerman në ambientin e "Red Bullit". Ekziston rreziku sidoqoftë, që mbi mesfushorin të nisë një ankand i vërtetë, duke qenë se i pëlqen edhe Interit dhe Lacios. Vlerësimi i tij, për momentin vërtitet rreth 30 milionë euro, por është ende herët për të folur për shifra.