Jo vetëm Mertens, Interi mendon për një ish-juventin në sulm
Interi do të bëjë një minirevolucion në sulm. Me Lautaron që mund të përfundojë te Barcelona, Sançezin që do të rikthehet te Junajtid dhe Espoziton që mund të huazohet, e vetmja siguri për Antonio Konten momentalisht mbetet Romelu Lukaku. Për këtë arsye drejtuesit zikaltër janë në punë për një sulmues. Sipas medias italiane, emri i parë në listën interiste është Dris Mertens, por së fundmi ka përfunduar edhe Moise Kin. Belgu i Napolit është 32 vjeç dhe me kontratën në skadencë këtë vit. Mertens ka prej kohësh në pjatë një ofertë të Monakos, por nuk e cilëson stimuluese, duke u bazuar te potenciali i kampionatit dhe tek Interi ka një "sponsor" si Romelu Lukaku. Ndërsa në rast largimi të Lautaros, zikaltrit do duhet të afronin një tjetër sulmues dhe së fundmi po qarkullon emri i Kin, 20 vjeç, ish-juventin, i bashkuar verën e kaluar me Evertonin për 40 milionë euro. Interi mund të përdorë edhe kartën "Vesino" që pëlqehet nga Karlo Ançeloti për të ulur vlerën e kartonit të Kinit.