Lajpcigu zgjedh Rashicën si pasardhës të Vernerit
Bomberi gjerman mes Interit e Junajtid, sulmuesi kosovar mbledh gjithmonë e më shumë admirues
Lajpcig është klubi i radhës që i është shtuar listës së gjatë të ekipeve që duan shërbimet e Milot Rashicës. Futbollisti i Kosovës është shtylla e skuadrës së Verder Bremenit, por dëshiron të ndërrojë ekip. Menaxheri i tij, Altin Lala, ka folur disa herë për largimin e tij, por tashmë ka dalë në skenë një tjetër klub, përveç atyre në Angli dhe Itali.
Lajpcig është i interesuar për shërbimet e sulmuesit 23-vjeçar, pas Borusias së Dortmundit dhe Aston Vilës që janë dy skuadrat për të cilat raportohet se e duan më së shumti Rashicën. "Prej asaj që ka mësuar "Veser-Kurier" nga burime të sigurta në klubin e Verderit, Rashica tani përballet me një kalim shumëmilionësh te Lajpcig. Diskutimet në mes të atyre që vendosin te Lajpcigu dhe menaxhmentit të lojtarit janë të avancuara, saqë një njoftim zyrtar për këtë transferim mund të pritet që në këtë muaj", ka raportuar gazeta gjermane, "Veser-Kurier". Miloti e njeh shumë mirë Bundesligën, kësisoj nuk përjashtohet mundësia që të ndërrojë skuadër, por jo kampionat. Klubi gjerman që këtë sezon është një prej pretendentëve kryesorë për të fituar titullin nuk kërkon të mbesë pa asnjë alternaivë nëse sulmuesi kryesor, Timo Verner, vendos të largohet në fund të sezonit nga skuadra e "Red Bull"-it. Kujtojmë se në garë për bomberin e kombëtares së Gjermanisë janë skuadra e Mançester Junajtid në Angli dhe Interi në Itali. Zikaltrit duan të plotësojnë vendin bosh që mund të lërë Lautaro Martinez, i cili përflitet gjithmonë e më shumë se është pranë kalimit te Barcelona në fund të këtij sezoni. Verneri pëlqehet shumë edhe nga trajneri i zikaltërve, Antonio Konte, që kërkon të formojë një dyshe të fortë në sulm me Romelu Lukakun për të ardhmen.