Hainer: Futbolli nuk do të jetë kurrë si më parë
Shifrat e çmendura të transferimeve janë një gjë e së shkuarës pas pandemisë së Koronavirusit, sipas presidentit të Bajernit të Mynihut, Herbert Hainer. Shpenzimet e viteve të fundit kanë prekur majat, duke vendosur edhe rekordin botëror me transferimin e Nejmarit nga Barcelona te PSG për 222 milionë euro në vitin 2017. Por me futbollin përpara një krize financiare, Hainer pret që situata të ndryshojë. Klube si Bajerni, Barcelona, Juventusi, Mançester Junajtidi dhe Atletiko e Madridit, janë mes gjigantëve që kanë vendosur të ulin rrogat e futbollistëve dhe stafit. "Pavarësisht se është e vështirë të bësh parashikime, është e natyrshme që do të ketë ndryshime", tha presidenti i Bajernit për revistën 51 të klubit. "Unë jam dakord me atë që thotë Uli Hënes (ish-presidenti) se çmimet e transferimeve do të ulen. Kjo është thjesht logjike. Kur të ardhurat bien, ka më pak para në qarkullim. Dhe duke parë ndikimin ekonomik të krizës së Koronavirusit në jetët e përditshme të njerëzve, shifrat e çmendura në miliona bëhen edhe më pak të justifikueshme sesa ishin në të shkuarën. Shpresa ime është që të ketë më shumë mirëkuptim. Unë dua t'i heq kapelën Hasan Salihamixhiçit për lidershipin sportiv të skuadrës sonë. Ata po e menaxhojnë shumë mirë situatën e Koronavirusit".