FIFA vendos, ja zgjidhja nëse s'ka akord me klubet
FIFA vendosi shtyrjen e afatit të skadimit të kontratave të futbollistëve në mbarë botën, njëkohësisht edhe shtyrjen e periudhës së merkatos verore të futbollit. E detyruar nga ndërprerja e aktiviteteve futbollistike në mbarë botën, FIFA lejoi ndryshimin e afateve të kontratave të futbollistëve dhe të transferimeve të lojtarëve duke iu përshtatur kalendarit të ri të ligave kombëtare. Deri më tani, asnjë vendim zyrtar nuk është ndërmarrë për rinisjen e kampionateve futbollistike në Europë apo as për kompeticionet europiane.
VENDIMET
Mbi gjithçka do të ndodhë në vijim, institucioni ndërkombëtar i futbollit do të marrë në shqyrtim disa çështje, për të cilat ekipet dhe lojtarët mund të kenë çështje ligjore për të zgjidhur. Nëse lojtarët nuk arrijnë akord me klubet e tyre, FIFA do të bazohet në këto pesë pika: 1) Ka pasur një tentativë për të gjetur akord mes klubit dhe lojtarëve; 2) Situata ekonomike e klubit; 3) Përshtatja e kontratës; 4) Fitimi neto i futbollistëve pas çdo rinovimi kontraktual; 5) Nëse futbollisti është trajtuar në mënyrë të barabartë ose jo.
PAGESAT
Institucioni ndërkombëtar i futbollit deri më tani nuk ka marrë vendim në lidhje me pagat e lojtarëve dhe stafeve të ekipeve të futbollit. Për sa i përket çështjes së pagesave të punonjësve të klubeve, FIFA u bën thirrje futbollistëve dhe vetë klubeve të ulen në bisedime për të gjetur zgjidhjen e ngërçit financiar. Kjo pikë ka ndezur një debat të madh, teksa shumë lojtarë refuzojnë të reduktojnë pagat për të mbuluar shpenzimet e klubeve për punonjësit e tyre, ndërsa disa klube të mëdha, si Barcelona, Juventusi, Atletiko Madrid, etj., janë solidarizuar duke pranuar të sakrifikojnë nga pagat mujore. Në shumë klube, lojtarët kanë pranuar vullnetarisht që të ulin pagat e tyre, duke mirëkuptuar situatat e vështira ekonomike që po kalon bota e futbollit në këto momente. Gjithashtu, edhe çështja e bilanceve financiare dhe "Fair Play"-t do të ketë një tolerancë nga UEFA dhe FIFA, për të mos qenë aq strikte në fund të këtij sezoni.