Ankth te Milani, presidenti: Kemi disa të infektuar
Stërvitja u zhvillua normalisht edhe dje, Maldini rikthehet në bazë pasi mposhti virusin
Skuadrat e Serisë A janë kthyer në stër vitje, por sipas protokollit të miratuar më parë, të gjithë futbollistët dhe stafet teknike duhet t’i nënshtroheshin testit me tampon. Pas Torinos, Fiorentinës dhe Sampdorias, makthi i virusit “COVID-19” pushton edhe Milanin. “Corriere dello Sport” raporton se te “Djalli” ka pasur 4 raste pozitive me Koronavirus, megjithëse pritet të mësohet sa prej tyre janë lojtarë dhe sa pjesëtarë të stafit teknik. Pavarësisht se ky lajm është dhënë nga burimi i sipërpërmendur, asgjë nuk ishte konfirmuar nga klubi mbi vërtetësinë e tij, derisa vetë presidenti Skaroni e konfirmoi atë në një dalje publike, ndonëse pa bërë emra. Fiorentina kishte 6 raste pozitive në ekip, ku 3 ishin lojtarë dhe 3 të tjerë anëtarë të stafit teknik, ndërsa Sampdoria kishte 4 raste, të cilët tashmë duhet të shkojnë dhe të qëndrojnë në karantinë. DYSHIME
Sa u përket kuqezinjve të dyshuar për pozitivitet ndaj Koronavirusit, duhet të bëhen disa analiza të tjera gjaku, të cilat do të faktojnë ekzistencën e antitrupave dhe një datë të përafërt mbi infektimin. Burime të pakonfirmuara flasin për dy futbollistë të ekipit të trajnerit Stefano Pioli dhe dy asistentë teknikë, por të gjithë janë asimptomatikë deri tani dhe po mbahen nën vëzhgim. Nga Milani pozicionimi zyrtar vonoi, çka shtoi dyshimet se lajmi mund të kishte doza të larta vërtetësie. Pozitiviteti i katër të dyshuarve sigurisht që do të jetë shoqëruar me karantinimin e tyre, ndërsa pjesa tjetër e skuadrës do të vijojë me përgatitjet në pritje të një njoftimi zyrtar për rinisjen ose jo të Serisë A. STËRVITJA
Nga imazhet e televizionit të Milanit dhe nga mediat
e ndryshme është e vështirë të dallosh mungesa në organikë, përveç atyre të Frenk Kesit dhe Zlatan Ibrahimoviçit. Suedezi pritet nesër mbrëma në Itali, ndërsa afrikani vijon të vuajë për të gjetur një fluturim që ta largojë nga
Bregu i Fildishtë, ku duket se ka ngecur për shkak të mbylljes së kufijve. Ndërkohë, pas mungesës së ditës së parë, në “Milanello” dje është parë edhe Paolo Maldini, i cili ka qëndruar në distancë nga grupi nën urdhrat e Piolit.