Rama inspekton stadiumin: Punë e mirë, ka qenë copë-copë
ryeministri Edi Rama ka inspektuar dje punimet në stadiumin e ri të Kukësit, i shoqëruar nga kreu i bashkisë dhe njëkohësisht presidenti i nderit te verilindorët, Safet Gjici. Ndërsa pa punimet, numri një i qeverisë u shpreh se është bërë punë e mirë, duke e krahasuar me atë që ishte më parë. “Është bërë punë e mirë, këtu ka qenë copë-copë, s’ka pasur asgjë”, u shpreh Rama gjatë vizitës në Kukës. Por nuk e la me kaq, pasi më vonë postoi edhe një shënim në “Facebook”-un e tij: “Jo vetëm një stadium i ri i denjë për sportdashësit e për skuadrën që lufton rregullisht për fronin kombëtar të futbollit, po edhe një qendër e re graviteti e zhvillimit social të një komuniteti, ku zotimet e mbajtura po rilindin shpresën tek e ardhmja, që do të marrë formë me projekte të mëtejshme të Rilindjes Urbane dhe Ekonomike të Kukësit e të krejt qarkut verilindor”. Safet Gjici sqaroi se stadiumi pritet të mbarojë në fund të muajit gusht, ndërsa shtoi se “spiunohet” nga tifozët për vijimin e punimeve. “Këtu vijnë çdo ditë 200300 veta, që shohin punimet, sidomos mosha 50 vjeç, rrinë dhe marrin në telefon, janë supervizorë të Faikut dhe informojnë çdo ditë. Janë shumë tifozë, shohin ça u bë sot ca u bë nesër”, u shpreh kryebashkiaku i Kukësit. Kujtojmë që punimet në këtë impiant kanë nisur në gushtin e 2019-ës. Ai do të ketë një kapacitet prej 8 mijë vendesh me një vlerë totale rindërtimi rreth 6.5 milionë euro (FSHF do të japë 50% të vlerës së investimit dhe 50% do të përballohet nga qeveria shqiptare). Sipas planit, pritet që impianti të përfundojë për një afat kohor prej afro 15 muajsh.