Reagon kryebashkiaku Suli: Stadiumi i Kamzës nuk prishet

Më në fund, ka ardhur edhe reagimi i kryebashkiakut të Kamzës, Rakip Suli, në lidhje me çështjen e stadiumit. Ai ka pohuar për “ABC News” se stadiumi i Kamzës nuk do të shembet, por gjithashtu ka pranuar se nëse diçka e tillë ndodh, duhet planifikuar më parë ku do të ndërtohet stadiumi i ri. “Deri tani nuk kemi pasur asnjë ide për marrjen e një vendimi për prishjen e stadiumit të Kamzës. Kamza nuk është në aktivitet dhe ne mund të gjejmë ambient tjetër për të ndërtuar stadium tjetër, sipas parametrave të duhur. Por për të shkuar te kjo pjesë ka një faturë ekonomikë dhe duhet edhe një projekt. Pastaj, duhet bërë dëgjesë publike me qytetarët e Kamzës. Jam kryebashkiak, nuk jam pronar. Për investimet në territorin e bashkisë vendoset me dëgjesa publike, jo vetëm për stadiumin. Nëse do kemi mundësi, mund të flasim për investime në stadium. Do të merremi edhe me skuadrën. Për stadiumin do të kërkojmë mbështetjen e Federatës Shqiptare të Futbollit, por edhe një ide mbi parametrat dhe kushtet, nëse do të vendoset për një stadium tjetër. Ata kanë specialistë që kanë ide më të qarta. Federata është në plan të parë, nëse vendosim zhvendosjen e këtij stadiumi nga qendra e Kamzës”, është shprehur kryebashkiaku Suli. Stadiumi i Kamzës ka qenë një çështje e nxehtë ditët e fundit. Pas lajmit të publikuar nga “Panorama Sport”, ka pasur reagime të shumta nga opinioni sportiv në qytetin e Kamzës, nga ish-zyrtarë, trajnerë dhe lojtarë, kuptohet, të gjithë të irrituar nga ky fakt. Nga institucioni i bashkisë nuk kishte pasur asnjë reagim deri tani, por ja ku vjen fjala e vetë kryebashkiakut Suli. Ai e mohon shembjen e stadiumit, por në të njëjtën kohë flet edhe për stadium të ri. Për stadiumin e Kazmës reagoi pak ditë më parë edhe Sindikata e Futbollistëve Profesionistë. Së fundi ka folur edhe presidenti i FSHF-së, Armand Duka, i cili sigurisht u shpreh kundër prishjes së stadiumit të Kamzës, ku vitet e fundit janë zhvilluar shumë ndeshje të Superiores.