Hysenshahaj: Vonesë absurde, nuk e di pse ekzagjerohet
Të rifillojë apo të stopojë? Nëse rifillon, kur duhet që skuadrat të nisin përgatitjet e pastaj ndeshjet? Këto janë dilemat “hamletiane” të futbollit shqiptar dhe tani duhet domosdoshmërisht një vendim. Kemi mbetur pas vendeve të tjera për një opsion konkret mbi fatin e këtij sezoni, por “më mirë vonë se kurrë”.
HYSENSHAHAJ - Apolonia, si të gjitha klubet e tjera, po e vuan këtë ndërprerje aktiviteti. Kapiteni Taulant Hysenshahaj thotë se po ekzagjerohet me ngurrimin për të marrë një vendim për rinisjen e kampionatit. “Mendoj se është i tepërt ky hezitim. Nëse deklarojmë se Shqipëria është ndër vendet më të mira në përballimin e pandemisë, është pa kuptim të jemi ndër të vetmet vende pa një vendim për sportin dhe futbollin. Ka specialistë të çdo fushe që mund të rekomandojnë kushtet paraprake se si mund të zhvillohet pjesa e mbetur e sezonit. Është absurde, e pabesueshme dhe as mund të mendohet se ky kampionat nuk mund të rifillojë”, thotë Hysenshahaj. I pyetur më tej nëse e lidh rifillimin më tepër me interesin e Apolonisë, mesfushori fierak thotë se e sheh shumë më gjerë këtë ristartim. “E shoh në interes të gjithë futbollit shqiptar dhe këtu përfshihet edhe Apolonia, por nuk e them thjesht për interesa të ngushta të skuadrës sonë. E dini pse? Sepse asgjë nuk është e sigurt. Futbolli ka të papritura në lojë dhe rezultate, ndaj askush nuk ka asgjë të garantuar, por të gjithë do të jenë të qetë, kur ndeshjet luhen në ballafaqime direkt në fushë”, përmbyll fjalën e tij kapiteni i Apolonisë, Taulant Hysenshahaj.