Ralf Rangnik vazhdon me sinjalet: S’do e refuzoja Milanin

Ralf Rangnik ka folur përsëri për “Bild” dhe fjalët e tij kanë shtuar hijet e dyshimit mbi Stefano Piolin, i cili aktualisht po punon për të kthyer në formë lojtarët e tij në prag të një rinisjeje të mundshme të Serisë A. Duke qëndruar te trajneri gjerman, në intervistën e fundit, është dukur më i hapur ndaj mundësisë për të zbarkuar te Milani, teksa shpjegoi: “Kam pasur një bisedë me përfaqësues të Milanit dhe m’u kërkua nëse isha i gatshëm të pranoja një bashkëpunim. Nga ana ime, informova ‘Red Bull’-in. Me çdo aspekt tjetër është marrë menaxheri im, ndaj nuk mund të përjashtoj tërësisht një transferim timin te kuqezinjtë”. Ditë më parë u tha se Rangnik do të takojë krerët e fondit “Elliott” në Londër. Nga biseda mes palëve do të bëhen më të qarta idetë e gjithsecilit. Në pritje të atij ballafaqimi, trajneri gjerman flet edhe për këndvështrimin e tij duke deklaruar: “Aktualisht Milani dhe kampionati italian kanë të tjera probleme. Nuk jam një njeri që ka vështirësi të imagjinojë nëse një projekt mund të funksionojë ose jo. Sigurisht, një aventurë te Milani më pëlqen, por nuk duhet të jetë doemos një mision vetëvrasës”. Në këto rrethana bëhet edhe më e vështirë të kuptohet se çfarë planesh ka 61-vjeçari që aktualisht është në krye të sektorit teknik të skuadrave “Red Bull”. Sidoqoftë, këmbënguljes së gazetarit për të mësuar më tepër mbi atë që do të jetë vendimi për të ardhmen, Rangnik iu përgjigj shkurt: “Nuk dua të tregohem mendjemadh, por rrethi i klubeve që mund të më interesojnë për të vijuar karrierën time është vërtet shumë i ngushtë”.