PSG do skonto për Ikardin, në marrëveshje edhe një mes Drakslerit dhe Paredesit
Vazhdojnë reflektimet mes klubit francez dhe Interit për argjentinasin
Këtë herë duket të jetë vërtetë hera e duhur. Çështja “Ikardi” hyn në pjesën kulminante. Pas disa javësh reflektimi, të imponuara edhe nga pandemia, shlyerja e ishkapitenit të Interit është shndërruar në temë me përparësi primare te PSG. Klubi francez dëshiron argjentinasin dhe synimi reciprok është të shndërrojnë huazimin (me të drejtë blerjeje) në blerje përfundimtare. Ikardi i ka bindur të gjithë në Paris, si pasues i Kavanit, duke gjetur menjëherë dhe me vazhdimësi rrugën e golit, por edhe dialogun në fushë me Mbapenë e Nejmarin (pas një fillimi në hijen e yjeve), përveç një raporti pozitiv me grupin dhe qytetin. Edhe pse,
më pas bashkëshortja-menaxhere Vanda Nara është detyruar të bëjë vajtje-ardhje Milano-Paris, në aeroplan privat me fëmijët. Jo gjithçka, megjithatë, mund të cilësohet si përfundimtare, pasi mendimi i PSG-së është i qartë: 70 milionë eurot e shlyerjes për të cilat u ra dakord verën e kaluar (për t’u
ushtruar brenda 31 majit) tashmë duhen rivlerësuar pas krizës së “COVID-19” që ka provokuar boshllëqe në bilancet e gjithë klubeve. Edhe në pronësinë e emirit Al-Khelaifi që, pas pezullimit të Ligës 1, parashikon humbje prej më shumë se 200 milionësh. Interi, ndërkohë, ngurron.
– Në Paris mendojnë se duhet ridiskutuar vlera e kartonit, që deri disa javë më parë dukej një biznes i mirë. Ja përse nuk mund të përjashtohen surprizat, mes të cilave interesi i pareshtur i Juventusit për Ikardin dhe rikthimi i interesit i vetë francezëve për Kavanin, në skadencë kontrate në qershor.
Data e parë për t’u fiksuar është fundi i majit, kur duhet konkretizuar shlyerja. Megjithatë, PSG nuk ka nxitim, duke mos pasur ndeshje në program, së paku deri në gusht kur më pas duhet të luajë Champions-in. E vetmja nevojë është paraqitja në çerekfinale me një skuadër konkurruese, pavarësisht periudhës së gjatë pa aktivitet. Ikardi ka ofruar garanci solide në Europë, me 5 gola në 6 ndeshje, Vërtet, nga mesi i janarit argjentinasi ka pësuar një fazë rënieje dhe parakalimin e Kavanit, por në moshën 27 vjeç përfaqëson të ardhmen. Ndërkohë, edhe uruguaiani, 33 vjeç, pret një telefonatë nga Parisi.
KËTU INTERI – Në krahun tjetër, në ambientet zikaltër qarkullon një klimë pozitive në kuadrin e bisedimeve, hipoteza e një uljeje nuk duket se bind plotësisht. Veçanërisht sepse klubi i Zhangut dëshiron të njihen bazat e operacionit të nisur një vit më parë, kur PSG mori lojtarin në huazim falas. Është e qartë që çështja do të jetë subjekt bisedimesh në javët e ardhshme. Nuk përjashtohet as mundësia që blerja e Ikardit nga PSG të zgjidhet edhe përmes një shkëmbimi: në këtë drejtim emrat e pëlqyer nga Interi janë Julian Draksler dhe Leandro Paredes. Rruga, megjithatë, është e shënuar. Dhe (ri)kthen Ikardin në Paris.