Bashkia e Beratit reagon për rrogat: E njohim si borxh, por…

Zyrtari Arben Qafa: Është një ngërç i trashëguar

Mungesa e pagesave për një periudhë relativisht shumë të gjatë ka bërë që trajnerët dhe sportistët elitarë në klubin Tomori ta bëjnë të ditur shqetësimin e tyre pranë "Panorama Sport". Disa prej ekipeve të shumësportëshit beratas, jo vetëm që kanë marrë pjesë në garat zyrtare me lekë xhepi, por edhe këto shpenzime kanë që nga viti i kaluar që nuk po ua kthejnë pas, mbi bazën e faturave financiare. Për këtë arsye trajnerët kanë paraqitur të gjitha dokumentet zyrtare të shpenzimeve të bëra. Gazeta kontaktoi Arben Qafën, drejtorin e pallatit të kulturës "M. Tutullani", që ka në varësi edhe klubin shumësportësh. Ja si u shpreh Qafa për këtë problem: "Po e njohim këtë shqetësim që kanë trajnerët dhe sportistët e klubit shumësportësh Tomori, për të cilët unë ushqej një ndjenjë respekti për punën që ata bëjnë mes sakrificash të mëdha, dhe këtë ua kam shprehur edhe atyre në takimet e herëpashershme që kam patur në zyrën time. Unë si person dhe si qytetar, për shkak edhe të traditës sportive familjare, gjithnjë shpreh keqardhje për komunitetin e sportit. Por më besoni, unë këtë ngërç financiar që nga muaji gusht i vitit të kaluar e kam trashëguar dhe si i thonë fjalës nuk është përgjegjësia ime. Unë jam emëruar në këtë detyrë në fund të muajit dhjetor të vitit të kaluar dhe në janar i kam thirrur të gjithë që të vinin të nënshkruanin kontratat e punës dhe për faj të tyre që erdhën në datën 28 janar kanë humbur pagesën e parë për këtë vit kalendarik. Pasi ua kemi kaluar pagesën vetëm për muajin shkurt dhe për shkak të pandemisë për dy muaj mars-prill nuk e dimë si do veprohet. Mund të them se ne e kemi njohur si borxh të gjithë periudhën e prapambetur të vitit të kaluar dhe do të gjejmë të gjitha mundësitë dhe format për t'i paguar qoftë edhe si shpërblim, megjithëse ata i kanë honorare këto pagesa, pasi një pjesë janë në punë shteti! Me sa di unë, të gjithë në bashki janë të interesuar për të kaluar pagesat dhe borxhet e trashëguara nga viti i kaluar" ka mbyllur deklaratën e tij drejtori Qafa, që përsëri nuk jep zgjidhje dhe i lë në pritje trajnerët dhe sportistët hallexhinj. Edi Spahiu