Skaroni konfirmon: Të infektuarit janë drejt shërimit
Pas lajmit të qarkulluar në median italiane se te Milani ka të infektuar me “COVID-19”, konfirmimi ka ardhur vetëm mbrëmjen e djeshme nga kreu i klubit: “Po, kemi të infektuar në skuadër, por fatmirësisht ata janë drejt shërimit. Dy Maldinit, si djali ashtu edhe i ati janë shëruar”. Paolo Skaroni, me të konfirmuar këtë mendon se Seria A duhet të vazhdojë. Në përfundim të mbledhjes me aksionarët minoritarë, presidenti i Milanit deklaroi: “Pozicioni i Milanit është i qartë dhe e kemi thënë shpesh se duam ta përfundojmë sezonin. Tashmë ka ardhur koha që të mësohemi të jetojmë me virusin, pasi nuk mund të presim zerimin për t’iu kthyer normalitetit. Vendimi përfundimtar i takon sigurisht qeverisë, por ne si drejtues na duhet të mendojmë edhe për të ardhurat. Dhe ky nuk është vetëm problem i Milanit, por i të gjitha klubeve europiane”. Kreu kuqezi ka folur edhe për sezonin. Me theksin mbi gabimet e bëra ai tha: “Kemi ekipin me moshë më të ulët të Serisë A dhe kjo flet qartë për synimin tonë. Kemi bërë gabime, kemi ndryshuar disa trajnerë e Xhampaolo nuk rezultoi një zgjedhje e goditur. Jemi të lumtur për Piolin dhe të gjithë së bashku le të punojmë që të ringremë Milanin. Një ekip është si një kor që ka solistë e futbollistët shpesh ndihen të gjithë si solistë”. Optimizmi i Skaronit lidhet me joshjen e “Djallit” nëpër botë. Jo vetëm një klub futbolli, por një markë e mirëfilltë, nga e cila pritet gjenerimi i të ardhurave që do të ndihmojnë forcimin e organikës. Duke folur për Milanin si kompani, 73vjeçari tha: “Klubi ynë është një markë globale sepse në botë kemi më shumë tifozë se çdo klub tjetër italian. Edhe në Europë jemi mes pesë të parave për preferencë pavarësisht se në kompeticionet ndërkombëtare kemi kohë pa fituar diçka. Në aspektin e biznesit, synojmë të pushtojmë kombe si Pakistani, India, Indonezia e Kina”.