Besëlidhja, Rustemaj: Kemi edhe shansin e ndeshjeve shtesë
Te Besëlidhja presin me shumë interes të mësojnë se çfarë vendimi do të merret për këtë sezon për pjesën e mbetur të ndeshjeve që kanë ndikim në fatin e lezhjanëve. Pas dy muajsh pushim, skuadrat kanë shumë deficite fizike dhe pas nisjes së stërvitjes individuale më 18 maj, siç është thënë nga Ministria e Shëndetësisë, duhet ende kohë që futbollistët të bëhen gati për ndeshjet zyrtare. Gjatë një prononcimi për “Panorama Sport”, mbrojtësi Elvis Rustemaj thekson: “U mbushën 2 muaj nga ndërprerja e kampionatit për shkak të Koronavirusit. Në shtëpi dhe aq sa na ka lejuar ligji, jam stërvitur për të ruajtur formën fizike, duke shpresuar se do të rinisë sezoni aty ku u ndërpre. Besëlidhja ka si objektiv ngjitjen në Superiore, por renditet e dyta, me diferencë të dukshme pikësh nga kreu. Nëse do të vijonte rregullisht kampionati, ndoshta do të ishim ne në krye ose afër Kastriotit. Gjithsesi, jemi në vend të dytë dhe kemi mundësinë e ndeshjeve shtesë për të provuar ngjitjen. Besëlidhja do ta shfrytëzojë këtë shans, nëse do të operohet me këtë formulë që është në fuqi. Edhe nëse kampionati ndërpritet këtu, ndeshjet shtesë duhet të zhvillohen, pasi janë të planifikuara pas mbylljes së kampionatit. Besëlidhja ka edhe Kupën e Shqipërisë,
kemi shkuar në 8-shen më të mirë. Ne duam që Kupa të luhet deri në fund ose të mos luhen ndeshje të tjera të saj. Besëlidhja ka si objektiv kryesor kampionatin dhe Superioren, por edhe në Kupë kënaqësia është të shkojmë sa më lart, të luajmë me Tiranën”.