Rinis sporti, zbardhet vendimi i ministres
“Zhbëhet çdo ndalesë e deritanishme, ja çfarë ndodh nga sot”
Data 18 maj dhe futbolli merr sinjalin e shumëpritur për të dalë në fushë. Ky lajm i shumëpritur dhe shumë i vonuar, sidomos për periudhën e mospërgjigjes dhe qëndrimit pezull mes ndalimit dhe lejimit, është dhënë së fundmi nga Ministria e Shëndetësisë me një urdhër që shfuqizon çdo ndalesë të mëparshme. Me firmë të Ogerta Manastirliut, Ministria e Shëndetësisë urdhëron lejimin e çdo stërvitjeje të sportistëve vetëm në ambientet e jashtme, duke zbatuar protokollet e sigurisë. Mirëpo, në këtë urdhër mungon specifikimi i stërvitjeve të grupuara, gjë e cila nuk saktësohet të jetë e ndaluar me urdhëresë, siç në fakt vijon të jetë e ndaluar çdo stërvitje në ambiente të mbyllura (palestra, stërvitje në pallate sporti etj.). Kësisoj, nga sot, futbollistët e Kategorisë Superiore do të duhet të nisin përgatitjet për rifillimin e sezonit futbollistik, çka është vendosur të luhet më 3 qershor dhe për Kategorinë e Parë të rinisë më 7 qershor. VENDIMI
Më 15 maj, ministrja e Shëndetësisë ka saktësuar dritën jeshile për rinisjen e stërvitjeve të futbollistëve. Ja vendimi i plotë:
“Urdhër nr. 326, datë 15.05.2020. ‘Për kufizimin e aktiviteteve sportive’. Në zbatim të pikës 4, të nenit 102 të Kushtetutës, nenit 7, pika 4 germa b të ligjit nr. 15/2016 ‘Për parandalimin dhe luftimin e infeksioneve dhe sëmundjeve infektive’ si edhe në zbatim të udhëzimeve të Institutit të Shëndetit Publik, me qëllim mbrojtjen e shëndetit
të popullatës nga infeksioni i shkaktuar nga ‘COVID-19’. URDHËROJ:
1. Stërvitjet e sportistëve lejohen të zhvillohen për të gjitha llojet e sporteve, vetëm në ambiente të hapura.
2. Aktivitetet sportive dhe
stërvitjet e sportistëve në ambiente të mbyllura vijojnë të jenë të ndaluara.
3. Aktivitetet e përcaktuara në pikën 1 të këtij urdhri të kryhen duke respektuar protokollet e sigurisë të miratuara nga Instituti i Shëndetit Publik.
4. Ngarkohet për ndjekjen e zbatimit të këtij urdhri Inspektorati Shtetëror Shëndetësor.
5. Çdo parashikim i mëparshëm që bie në kundërshtim me këtë urdhër, shfuqizohet. Ky urdhër hyn në fuqi menjëherë”.