Kukësi grumbullohet në Elbasan, të karantinuarit mbeten pezull
Stërvitje me orar të stërzgjatur, por ka dilema për 6 të riatdhesuarit
Kukësi do të rinisë zyrtarisht stërvitjen sot. Prej disa ditësh grupi është kompletuar, pasi janë riatdhesuar edhe 6 lojtarë që kishin ngecur në Kosovë dhe Maqedonia e Veriut. Vendimin e dhënë nga FSHF-ja, klubi e ka marrë të mirëqenë dhe ka nisur që të bëjë gati infrastrukturën për të zhvilluar seancën e parë pas shpërthimit të pandemisë. Gazeta "Panorama Sport" mëson se verilindorët do të zhvendosen në Elbasan për të kryer përgatitjet, qytet ku do të bëhet edhe grumbullimi. Drejtuesit e klubit kanë marrë një shkresë prej federatës dhe Ministrisë së Shëndetësisë, ku në të përcaktohen qartë të gjitha elementet dhe kushtet që klubi duhet të plotësojë sa i përket higjienës, distancimit dhe mënyrës se si do stërvitet. Referuar protokollit, nënkampionët në fuqi të vendit do të jenë të detyruar që të ushtrohen me grupe prej 3-4 vetësh, ku do të ruhet distanca fizike prej 1.5 metrash. Gjithashtu seanca do të kryhet me orare të ndryshme. Pra, jo njëkohësisht të gjithë lojtarët. Ekipi pritet të niset paraditen e sotme drejt Elbasanit, ku transporti do të kryhet me autobusin e klubit dhe me disa automjete private të autorizuara nga klubi ku në të do të qëndrojnë jo më shumë se 3 persona. Qëndrimi do të bëhet në një hotel dhe stërvitja do të kryhet në një fushë private, por nëse do u duhet, klubi mund të përdorë si alternativë dhe fushën e futbollit në Cërrik.
Me bërjen publike të vendimit për rinisjen e kampionatit në datën 3 qershor, drejtuesit e Kukësit nisën të marrin menjëherë masa. Së pari, plotësuan organikën duke kthyer lojtarët që ishin bllokuar jashtë kufijve të Shqipërisë. Shtatë prej tyre ndodheshin prej më shumë se dy muajsh në shtëpitë e tyre, e konkretisht ishin kapiteni Besar Musolli, Enis Gavazaj, Zenel Gavazaj e Ilir Avdyli në Kosovë. Lista vazhdonte me Edis Maliqin dhe Valon Ethemin, të cilët ndodheshin në Shkup e Tetovë. Klubi prej gati 3 javësh po merrej me plotësimin e dokumentacionit dhe procedurave përkatëse për riatdhesimin për Musollin dhe vëllezërit Gavazaj, të cilët janë të pajisur me pasaportë shqiptare dhe afrimin për punëmarrësit Avdyli, Ethemi e Maliqi. Me konfirmimin e vendimit për rinisjen e kampionatit, klubi ka arritur të sjellë në Shqipëri pa probleme futbollistët në fjalë. Të gjithë lojtarët në fjalë janë karantinuar në banesat e tyre, pasi rregullorja ka ndryshuar për personat që kanë kontratë pune. Ata kanë zbatuar të gjithë rregulloren dhe protokollin e shtetit shqiptar. Por, sa i përket stërvitjes, problemi i pazgjidhur. Karantina nënkupton qëndrimin në shtëpitë e tyre dhe mosdaljen jashtë, pasi rrezikojnë 7 milionë lekë të vjetër gjobë. Kjo gjë mbetet për t'u parë se si do veprohet pasi klubi pritet që t'i bëjë kërkesë federatës dhe ministrive përkatëse për lëvizjen e lojtarëve në fjalë, gjë që nuk është e konfirmuar se si do veprohet. Pra, 6 lojtarët e karantinuar mbeten në ajër. Ndërsa çështje më vete është Vesel Limaj, i cili ndodhet ende në Berlin dhe nuk dihet se kur do të marrë avionin për të shkelur në tokën shqiptare.