Plotësohet Luftëtari, vetëm dy lojtarë pritet të mungojnë

Luftëtari nën drejtimin e dyshes Neritan Novi-Arbër Bistri pritet të nisin sot përgatitjet për pjesën e mbetur të sezonit. Ndalesa e gjatë për gati 65 ditësh, për shkak të pandemisë “COVID-19” që preku dhe futbollin, bëri që topi të mos rrokullisej në fushat e kampionatit shqiptar. Madje, ndërprerja e gjatë e garës i “penalizoi” futbollistët, duke u privuar atyre të drejtën e të stërviturit në kushte normale. Tashmë që vendimi për rinisjen e kampionatit është zyrtarizuar nga FSHF-ja dhe data 3 qershor do të hapë siparin e dhjetë ndeshjeve të mbetura (përfshirë këtu edhe ndeshjet e Kupës së Shqipërisë), për Luftëtarin, e sotmja do të startojë me përgatitjet për ndeshjen e javës së 27-të. Verilindorët e Kukësit janë kundërshtarët e Luftëtarit, e kësisoj në orën 17:00 bluzinjtë pritet të jenë të plotë në numër nën urdhrat e trajnerit Neritan Novi. Burime konfidenciale pranë stafit bluzi konfirmojnë faktin se të gjithë lojtarët janë njoftuar në kohë për të qenë prezent në Gjirokastër, të gatshëm për startimin e përgatitjeve, sipas protokollit dhe udhëzimeve të dhëna nga institucionet shtetërore. Luftëtari në kontingjentin e tij ka lojtarë me përhapje të gjerë të hartës gjeografike të vendit, ndaj dhe bashkimi i tyre me grupin në kohë mbetet për t’u parë. Si klubi me lojtarë të rinj në kampionatin shqiptar dhe për më tepër me kontrata 3vjeçare, Luftëtari sot pritet të jetë i kompletuar, teksa në pikëpyetje mbetet ardhja e dy lojtarëve që banojnë në Greqi, Donald Açkës dhe Andon Karabinës. Po të njëjtat burime bëjnë me dije për “Panorama Sport” se si mesfushori me tipare shkatërruese Donald Açka dhe mbrojtësi Andon Karabina janë njoftuar për rifillimin e përgatitjeve pas pauzës së tejzgjatur të pandemisë së “COVID19”. Gjithçka që ka të bëjë me mënyrën e mbërritjes së futbollistëve nga Greqia në Gjirokastër do të mësohet nga sot dhe në ditët në vazhdim. Megjithatë, për t’u veçuar është fakti se ka lojtarë që jetojnë me familje në qytete të listuara në zonën e kuqe, ndaj dhe sot do të mësohet nëse do të jenë apo jo nën urdhrat e stafit teknik. Jurgen Dushkaj, Arlis Shala, Armenis Kukaj, Amer Duka, Aldrit Oshafi, Enes Isufi, Erald Hyseni, Griseld Lika, Joan Çela, Elian Çelaj, Franc Lala, Ardit Ziaji, Kliton Qato, Arbër Mehmetallari, Kabir Tahiraga, Redon Dragushi janë emrat e lojtarëve që nga sot do të nisin udhëtimin e lënë për gjysmë, atë të përfundimit të dhjetë javëve të fundit të Kategorisë Superiore shqiptare. Sakaq, mospërfshirja e Gjirokastrës në zonën e kuqe, falë mosprekjes nga “COVID-19” për një grup lojtarësh vendës ka mjaftuar për të mos e humbur shansin për t’u stërvitur në mënyrë individuale brenda fashës së lejuar. Këtu s’ka bërë përjashtim as kapiteni Aurel Demo, i cili nuk udhëtoi drejt Greqisë aty ku edhe banon, pas mbylljes së kufijve tokësorë me shtetin fqinj. Tri ditë më parë, me grup minimal lojtarësh vendës, Luftëtari mes protokollit rigoroz dhe detyrave të kryera me përpikëri zbriti në terrenin “Fusha e Vjetër” për t’u dhënë jetë përgatitjeve në kushtet e temperaturave të larta.