Konte me stil “anglez”, pas Eriksenit telefonoi edhe Mertensin
Trajneri zikaltër ka dashur ta bindë personalisht sulmuesin e Napolit
Në ambientet e Napolit, një nga nyjet për t’u zgjidhur i përket të ardhmes së Dris Mertensit. Fundi është ende për t’u shkruar, por ndërkohë duket se Interi ka hedhur hapa të rëndësishëm përpara për të siguruar belgun, në skadencë kontrate në qershor me klubin “axurr”. Tifozët napolitanë janë mobilizuar mbi të gjitha përmes rrjeteve sociale në përpjekje për të mbajtur një nga idhujt e tyre dhe vetë sulmuesi ka vendosur një “like” në foton e iniciativës, duke konfirmuar lidhjen e fortë me tifozët e qytetin dhe ndoshta për të treguar se po të ishte
në dorë të tij, do të qëndronte. Tani gjendet përpara një zgjedhjeje jete, me pak fjalë.
- Siç thamë, Mertens është në skadencë në qershor dhe, pavarësisht se 31 vjeç, ka eksperiencë ndërkombëtare për të shitur. Dhe Antonio Konte, që do të përpiqet të pasurojë repartin e sulmit në
verë, i njeh cilësitë e lojtarit, që e ka kërkuar edhe në kohët e Çelsit. Kështu që si atëherë në Londër, ka menduar të telefonojë vetë sulmuesin: një metodë “alla trajner Premier Lige”, kampionat ku përveç roleve teknike nevojiten edhe ndërhyrje në merkato. Njësoj siç Konte veproi edhe me Eriksenin, një
telefonatë e tipit: “Eja na ndihmo, kemi nevojë për karakter dhe personalitet”.
- Ndërkohë që administratori i deleguar Xhuzepe Marota dhe drejtori sportiv Piero Auzilio kanë menduar të bëjnë pjesën tjetër. Ideja e Interit momentalisht është të ofrojë 5 milionë euro në sezon për 2 vitet e ardhshme me opsionin për një të tretë: tani mbetet të përcaktohen detajet e fundit, si komisionet e menaxherëve dhe premiot në momentin e firmës. Kontaktet me Konten dhe biseda me mikun Lukaku mund të rezultojnë vendimtare në zgjedhjen e tij. Në krahun tjetër, Xhenaro Gatuzo, trajneri i Napolit, po përpiqet çdo ditë që t’i ofrojë besimin e nevojshëm për të qëndruar, po ashtu siç ka vepruar edhe drejtori sportiv Kristiano Xhuntoli. Nuk përjashtohet as një takim i ri me presidentin Aurelio De Laurentis pas atij të 1 marsit, ndoshta për të dëgjuar një ofertë më të mirë.