Ja kalendari i rikthimit, por qeveria do garanci
Kampionati në Itali nuk ka ende një përgjigje zyrtare nga qeveria për datën kur do të fillojë, por 13 qershori është vendosur nga Liga e Serisë A. Ajo madje ka hartuar edhe kalendarin për rifillimin. Nëse do të luhet në datat 13-14 qershor, atëherë do të zbresin në fushë ekipet për të zhvilluar javën e 27-të të kampionatit, pastaj katër ditë më vonë do të ketë vend për ndeshjet e prapambetura të javës së 25të, mes tyre edhe Inter-Sampdoria, për të cilën u bënë shumë diskutime dhe debate. Pasi të përfundojnë këto 4 ndeshje, atëherë kampionati do të vazhdojë normalisht sipas datave të përcaktuara. Në fillim të korrikut do të luhen edhe gjysmëfinalet e kthimit të Kupës së Italisë, Juventus-Milan dhe Napoli-Inter dhe në 22, finalja e këtij kompeticioni. Në pikën e verës do të luhet edhe java e fundit e kampionatit italian, e cila mund të rezultojë vendimtare në përcaktimin e fateve të sezonit me sfidat Juventus-Roma, Napoli-Lacio dhe Atalanta-Inter. Gjithçka është në letër, sepse ministri i Sportit, Spadafora, thotë që lojtarët janë të shqetësuar dhe i dërgojnë mesazhe përditë. "Dua t'ju them që të mos bëhemi të gjithë fenomenë dhe të marrim kompetencat që nuk na takojnë. Nuk mund të jemi të gjithë arbitra, shkencëtarë, trajnerë dhe futbollistë", ka thënë ministri. Nga ana tjetër, kryeministri Konte nuk e jep një datë përfundimtare dhe thotë se nuk ka garanci totale për rinisjen e kampionatit. Gjatë kësaj kohe po bëhen bisedime të shumta mes palëve për të hartuar një protokoll të saktë.