Stërvitje në 1 milion metra katrorë, Zidan shtrydh ekipin në “Valdebebas”

Zbor te Reali, vrap në çdo cep të qendrës stërvitore

Një stërvitje e tillë kishte kohë që nuk ishte parë në Madrid. Në seancën e gjashtë stërvitore (të shtunën) pas rikthimit nga izolimi për shkak të Koronavirusit, Zinedin Zidan dhe përgatitësi i tij Gregori Dypo kishin përgatitur një surprizë për futbollistët e tyre. Me qendrën stërvitore të gjithën për vete (duke qenë se nuk ka aktivitete të tjera), Zidan vendosi t’i bënte zbor në kuptimin e parë skuadrës së tij. Mbi 1 milion metra katrorë në “Valdebebas” shërbyen që përgatitësi fizik Gregori Dypo ta “shtrydhte” ekipin dhe t’u jepte atyre një ngarkesë më shumë sesa normalja. Ushtrime të shumta jashtë terrenit të lojës, nëpër shkallë, lulishte dhe perimetri përreth hotelit u përshkua me vrap. Duke qenë se dita e diel do të ishte pushim, të gjithë duhet të shkonin në shtëpitë e tyre me kalori të harxhuara.

SURPRIZA - Kur shkuan në qendrën stërvitore, lojtarët u befasuan kur morën këshillën që duhet të vishnin atletet e vrapit dhe do të duhet të djersitnin pak jashtë fushës së lojës. Në kushte normale, puna bëhet në fushat 1 dhe 2 të “Valdebebasit”, por duke qenë se në këtë qendër stërvitore nuk ka asnjë tjetër, Dypo e përdori për vrap. Vrapuan në parkingun e sallës së konferencave dhe në lulishtet e qendrës stërvitore. Ky është një territor jo shumë i njohur nga lojtarët e ekipit të parë, pasi aty kalojnë më shumë ata të akademisë. Që nga koha kur Pintus i stërviti lojtarët në shkallët e stadiumit “Bernabeu” pas pushimit të Krishtlindjeve, lojtarët bënë një tjetër përgatitje larg terrenit të lojës. Dimensionet e “Valdebebasit” i lejojnë përgatitësit që të

bëjnë një maratonë sepse është mbi 1 milion metra katrorë (1.2 ekzaktësisht), 40 herë më e madhe se stadiumi “Santiago Bernabeu”, 16 herë më e madhe sesa “Sheshi i Kuq” në Moskë, 2,7 herë më e madhe sesa shteti i Vatikanit. Përveç kësaj stërvitjeje të lodhshme, lojtarët zhvilluan edhe një seancë

me topin, ku munguan Luka Joviç dhe Mariano Diaz. Ata bënë stërvitje vetëm në palestër. Lajmi i mirë është që Eden Hazard dhe Marko Asensio janë duke punuar me pjesën tjetër të skuadrës. Zidan e kishte lënë pushim ekipin ditën e djeshme, ndërsa sot rikthehen sërish në stërvitje.