Seria A vlerëson “play off”-et, më 28 maj vendimi
4 të parat luajnë për titull, 6 të fundit për mbijetesë
Nuk ka ngjarje sportive në Itali deri më 14 qershor dhe hipoteza e rinisjes së Serisë A për datën 13 qershor ka dështuar zyrtarisht. Shtyrjet e vazhdueshme dhe vështirësitë për të gjetur një marrëveshje në lidhje me protokollin shëndetësor, e kanë bërë kampionatin italian më të pasigurtin për të përfunduar këtë sezon mes ligave kryesore të Europës. Tani, data më e mundshme që topi të rrotullohet përsëri në Itali është 20 qershori. Duke konsideruar që UEFA ka kërkuar mbylljen e turneve kombëtare brenda datës 3 gusht, po shkohet drejt limiteve të dështimit të sezonit dhe vështirë se me këto afate do të arrihet që të zhvillohen normalisht të 12 javët e mbetura të kampionatit (dhe disa të tjera për t'u rikuperuar), pa llogaritur këtu ndeshjet e kthimit të gjysmëfinaleve të Kupës së Italisë dhe finalen. IDEJA "PLAY OFF" -Për këtë rikthehet hipoteza që shumë i tremben, sepse do të sillte modifikimin në mënyrë të konsiderueshme të rregullsisë së një sezoni që nisi me një formulë dhe tani është i destinuar të mbyllet me një rregullore sportive krejt të ndryshme, përtej ndryshimit teknik të pesë zëvendësimeve miratuar në nivel europian. Po flasim për organizimin e "Play Offeve", një term pak i përdorur në botën e futbollit në formulën e kampionateve të mëdha të Europës, pavarësisht se në Itali e përdorin nga Seria B në ligat e mëposhtme. Federata Italiane e Futbollit po mendon për të modifikuar formatin, duke e limituar në vetëm 10 numrin e skuadrave të përfshira dhe jo në 12 siç mendohej në një
moment të mëparshëm. Katër të parat, Juventusi, Lacio, Interi dhe Atalanta do të luanin për titullin kampion, duke përjashtuar Romën dhe Napolin, ndërsa gjashtë të fundit: Torino, Sampdoria, Xhenoa, Leçe, Spali dhe Bresha do të luftonin për të
mos rënë në Serinë B. Vendi i organizimit të ndeshjeve do të ishin stadiumet e Italisë Qendrore dhe Jugore.Është një projekt jo i thjeshtë për t'u vendosur në praktikë, duke qenë se do të gjejë kundërshtimet e shumë klubeve, duke e vonuar më tej përfundimin
e këtij sezoni të trazuar dhe rritur mundësinë e mbylljes së tij përpara kohe, duke mos luajtur. Por udhëzimet e UEFA-s janë të qarta, përpara se të shkohet drejt anulimit, duhet bërë gjithçka që verdiktet të jepen në fushën e lojës, me meritë sportive.