Levandovski, specialisti... i penalltive
Në të kaluarën, në ndeshjet në kampionat e ka ndalur vetëm... Manuel Nojeri
Në minutën e 40-të të javës së 26-të të Bundesligës, Robert Levandovski shënoi sërish për skuadrën e Bajernit të Mynihut. Këtë herë me anë të një 11-metërshi, një distancë nga e cila polaku mund të quhet pa frikë një specialist, një person i akullt që rrallë gabon. 31-vjeçari ka perfeksionuar në mënyrë shembullore teknikën e tij me kalimin e viteve, aq sa tashmë është e pamundur që ai të gabojë përpara portës, nga pika e bardhë.
SHIFRAT
Nga vështrimi drejt portierit dhe deri te vrulli përpara goditjes... Robert ka rritur në mënyrë të pabesueshme mënyrën e ekzekutimit të 11metërshave. Një mashtrim i lehtë me sy dhe më pas gjetja e cepit, ku portieri e ka të pamundur të kapë topin, edhe nëse arrin të kuptojë krahun. Në kampionat, Roberto Levandovski ka shndërruar në gol 26 nga 29 penalltitë e goditura prej tij. Rekordi në Bundesligë për penallti të shndërruara në gol mbahet pikërisht nga numri 9 i Bajernit të Mynihut, me plot 17 gjuajtje të sakta radhazi. Në total, gjatë karrierës së tij (edhe larg Bundesligës), bomberi numëron 35 realizime nga pika e bardhë në 39 mundësi që i janë dhënë. Vetëm në gusht të vitit 2014, në ndeshjen e vlefshme për Kupën e Gjermanisë kundër Mynsterit; në mars të 2018ës ndaj Hamburgut dhe në janar të 2019-ës kundër Shtutgartit, kanë qenë ditë të "zeza" për "Levën". Madje, duke mbetur vetëm te çështja e kampionatit, ky specialitet i futbollistit bavarez njihej që nga koha kur luante për Borusian e Dortmundit, por fati deshi që mes këtyre dy aventurave, portieri i vetëm që ka arritur ta ndalë Robertin ka qenë Manuel Nojer, kapiteni i tij në Mynih, pasi dy penalltitë e tjera kanë përfunduar në shtyllë.
FILLIMET
Përqendrimi dhe goditja
me forcë e topit ka qenë mënyra e ekzekutimeve të Levandovskit në fillimet e karrierës. Me kalimin e viteve ky variant u bë i pasigurt pasi portierët nisën të kuptonin takikën tij. Më pas, në variantin e dytë, ai nisi të vështronte vetëm portierin dhe më
pas godiste pa hedhur sytë te topi. Përfundimi: shumë topa përplaseshin në shtyllë... Për të ardhur tek ekzekutimi në mënyrë perfekte duhet të prisnim sezonin 2019-2020. Polaku ndryshoi vrullin dhe mënyrën e goditjes duke mos u lënë asnjë mundësi portierëve
për të reaguar. Në stërvitje, ai qëndron shpesh me Manuel Nojerin apo Sven Ulraishin për të provuar goditjet e tij, në pritje të penalltive decizive, si ato të finalës së Ligës së Kampioneve për shembull, trofeu që ëndërrohet nga polaku prej vitesh.