KOKSH: Rreziku i kapërcyer, duam leje për Lojërat Olimpike

Teksa futbolli ka nisur aktivitetet sportive, me stërvitjet në grupe që nga 18 maji, shumë prej sporteve individuale, por edhe ato kolektive që punojnë në salla të mbyllura, nuk kanë ende leje nga qeveria dhe ministritë përkatëse për të rifilluar përgatitjet. Për këtë, KOKSH, me anë të presidentit Viron Bezhani, i ka dërguar një letër Ministrisë së Arsimit, Rinisë dhe Sportit si dhe për dijeni është vendosur edhe Ministria e Shëndetësisë, në kërkesën për të rifilluar stërvitjet.

Ja letra:

"Drejtuar Ministrisë së Arsimit, Sportit Dhe Rinisë. Për dijeni Ministria e Shëndetësisë dhe Mbrojtjes Sociale. E nderuar znj. Ministre. Komiteti Olimpik Kombëtar Shqiptar, pasi vlerësoi impenjimin e qeverisë për kapërcimin e pandemisë së 'COVID-19', gjykon se në sajë të këtyre masave dhe ndërgjegjësimit të qytetarëve, rreziku duket i kapërcyer. Ndaj, u kërkoj institucioneve përgjegjëse të marrin në konsideratë rifillimin e aktiviteteve sportive, si për futbollin ashtu edhe për sportet e tjera.

Duke qenë se rifillimi i aktiviteteve stërvitore dhe garuese ka rëndësi të madhe sportive për aktualitetin dhe sidomos për perspektivën e përfaqësimit të Shqipërisë në aktivitete ndërkombëtare si dhe në Lojëra Olimpike, ne kërkojmë që në bashkëpunim me federatat shqiptare të sportit dhe KOKSH, të sigurohet ky rifillim i aktiviteteve sportive. Gjithçka do të kryhet në respekt të shëndetit të sportistëve e trajnerëve si dhe në dobi të arritjeve të vlerave dhe rezultateve sportive kombëtare. Me respekt, Viron Bezhani", shkruhet në letrën e KOKSH drejtuar ministrive përkatëse.