Roi Makai: Robert, lideri i këtij Bajerni

Ish-bomberi holandez, elozhe Levës: Fat për Bundesligën që ka një sulmues si ai dhe Halandi

Roi Makai, një ndër bomberat më vdekjeprurës të historisë së Bajernit të Mynihut. Holandezi, në një prononcim për të përditshmen "Bild", konfirmoi se vazhdon të jetë ende shumë i lidhur me Bundesligën, kampionat të cilin e ndjek me vëmendje, një arenë në të cilën la gjurmët e tij të rëndësishme mes viteve 20032007, duke shënuar 78 gola në 128 ndeshje. Madje, si një bomber në pension, Makai nuk mund të mos admirojë një prej pasardhësve të tij më të fortë në Bavari, polakun Robert Levandovski, që sipas tij është pika më e fortë e Bajernit të ditëve të sotme. "Levandovski është një nga sulmuesit më të mirë në botë. Shumë i kompletuar! Golat e tij janë jetikë për bavarezët, të cilët kanë fituar shumë. Sigurisht që atij i mungon një trofe i rëndësishëm si Champions-i, por jam i bindur se në të ardhmen do ta arrijë ta fitojë", tha Makai. Holandezi tha gjithashtu se një nga lojtarët që premton shumë te Bajerni është edhe bashkëkombësi i tij, Zhoshua Zirkze. "Zirkze është në rrugën e duhur për t'u bërë një lojtar i madh.

Kur ishte te Fejnordi, unë e trajnova me sulmuesit e skuadrës së parë. Ishte vetëm 16 vjeç. Ai është pa dyshim shumë i talentuar, por ende i ri dhe mund të përmirësohet. Haland? Nuk ka asgjë tjetër për të provuar se çfarë sulmuesi është. Kur sheh numrat e tij, e kupton se ai djalë ka lindur vetëm për të shënuar. Unë jam kurioz ta shoh se si do të evoluojë, por ajo që ka bërë deri më tani është e pabesueshme. Në këto pak muaj me Dortmundin ka arritur të shënojë gola të rëndësishëm, si ai ndaj Shalkes në derbi së fundmi për shembull. Ndaj them me bindje se Bundesliga është me fat që ka në përbërje dy sulmues si Levandovski dhe Haland", përfundoi Roi Makai.