Inter, Bajern dhe Real, bashkë kundër virusit
Triangolarja në tri qytete, milionat për shëndetësinë
Një ndihmë konkrete për strukturat mjekësore dhe spitalore, e themeluar mbi kohezionin mes vendeve europiane: lind kështu "European Solidarity Cup - Football for Heroes" ("Kupa Europiane e Solidaritetit - Futbolli për Heronj"), event i organizuar nga Interi me pjesëmarrjen e Bajernit të Mynihut dhe Realit të Madridit që do të zhvillohet në vitin 2021. Iniciativën e ka nisur klubi zikaltër me një komunikatë zyrtare. Tri klubet do të sfidohen në një "triangolare" dhe secila nga tri ndeshjet në kalendar do të pritet me turne në tri qytetet europiane: në Milano do të luhet Inter - Bajern, në Madrid zikaltrit do të sfidojnë Realin, ndërsa në Mynih do të jetë radha e bavarezëve kundër spanjollëve. Datat e takimeve do të fiksohen në bazë të kalendarëve të secilës skuadër dhe vetëm në momentin kur tifozëve do u lejohet prania në stadium. Arkëtimet e të gjitha ndeshjeve do u shpërndahen strukturave sanitare, si simbol i mbështetjes dhe sakrificës së madhe të bërë nga punonjësit e mjekësisë, në këtë periudhë të frikshme, e cila vazhdon që të jetë një rrezik i madh dhe i pakundërshtueshëm.
STIVEN ZHANG
"Pandemia ka goditur me forcë të madhe popullatën e të gjithë botës", ka komentuar eventin presidenti i Interit, Stiven Zhang. "Puna e madhe e personelit sanitar ka qenë thelbësore për të na lejuar të shohim sërish drejt së ardhmes. Me këtë iniciativë duam t'i falënderojmë ata në mënyrën tonë më të mirë të mundshme".
KARL-HAINC RUMENIGE
Bajerni i Mynihut, do të marrë pjesë së bashku me Realin e Madridit dhe Interin në turneun europian të solidarizimit në vitin 2021. Me këtë nismë, tri nga klubet me të mëdha në botë kërkojnë të grumbullojnë dhe të mbështesin me sa më shumë të ardhura që do të fitohen nga ndeshjet, infrastrukturën mjekësore. "COVID-19 e ka goditur shumë rëndë Europën", tha Karl Hainc Rumenige. "Me ndeshjet e shumta që kemi luajtur në Champions, kemi arritur të krijojmë një marrëdhënie të mirë me to. Madje me njërën prej tyre kemi edhe binjakëzim. Ky event do të jetë në shërbim të të prekurve nga virusi
dhe në përmirësimin e masave për të parandaluar një valë të dytë apo të tretë. Me të dyja skuadrat kemi një marrëdhënie të shkëlqyer, kjo jo vetëm në rang klubesh, por edhe shtetesh. Italia ashtu si dhe Spanja janë destinacione pushimesh për miliona gjermanë, ndaj ndihma për to është një përgjegjësi edhe e jona. Ndeshjet janë programuar të luhen në të tria qytetet.
Infermierët dhe doktorët po bëjnë diçka të jashtëzakonshme për njerëzit, por edhe për klubet në këtë periudhë. Për këtë arsye turneu do të quhet 'futbolli për heronj'. Duam t'i falënderojmë mjekët dhe infermierët në mënyrën tonë. Ato do zhvillohen edhe nëse deri atëherë nuk janë lejuar ende tifozët të hyjnë në stadium. Të ardhurat mund të merren shumë mirë edhe
nga e drejta televizive. Real Madrid-Inter do të luhet në kryeqytetin spanjoll. InterBajern në Milano dhe Bajern-Real Madrid në Mynih. I pranishëm në 'Allianz Arena' do të jetë edhe një i ftuar special, Markus Sëder, Ministri i Bavarisë, një nga njerëzit që bëri të mundur nisjen e Bundesligës në fundjavën që kaloi", u shpreh shefi ekzekutiv i Bajernit të Mynihut.